༄༅། །ལུས་སེམས་གང་རུང་ཞིག་སྡུག་བསྔལ་ལས་སྲུང་མི་དགོས་པར་འགྱུར། གཉིས་པ་ལྟར་ན་གཞན་ལུས་ཀྱིས་གཞན་སེམས་བསྲུངས་པ་ལ་མི་རིགས་པ་མེད་པ་ལ། གཞན་དབང་མིག་ལ་སོགས་པ་ཡིས། ། རང་དོན་སྒྲུབ་པ་རིགས་མ་ཡིན། །ཞེས་པ་མི་འཐད་དོ་ཞེ་ན། བདག་ལ་སྲུང་བྱའི་ཆ་དང་སྲུང་བྱེད་ཀྱི་ཆ་གཉིས་ལས་སྲུང་བྱའི་ཆ་ནས་བདག་གཞན་བརྗེ་བ་ཡིན་ནོ། །དེ་ལ་རེས་འགའ་ནི་བདག་གཞན་མིང་དོན་གཉིས་ཀ་བརྗེས་པ་དང༌། རེས་འགའ་ མིང་འབའ་ཞིག་བརྗེས་པ་དང༌། རེས་འགའ་བདག་གི་ལུས་གཞན་ལ་བྱིན་པའི་ཚུལ་གྱིས་འཆད་དོ་ཞེས་བཤད་ཀྱང་དཔྱད་པའི་གཞི་སྟེ། ལུས་སེམས་གང་རུང་བརྗེ་འམ་གཉིས་ཀ་བརྗེ་ཞེས་རང་གིས་དོགས་པ་བཀོད་ནས། སྲུང་བྱ་དང་སྲུང་བྱེད་ གཉིས་ལས་སྲུང་བྱའི་ཆ་བརྗེ་ཞེས་རང་གིས་ལན་འདེབས་པ་ནི་བདག་གི་བུ་རམ་དང་གཞན་གྱི་སྦྲང་བརྗེ་བ་ན་སྣོད་བཅུད་གཉིས་ཀ་བརྗེ་འམ་གང་རུང་བརྗེ་ཞེས་དོགས་པ་བཀོད་ནས་བུ་རམ་ལ་ཤིང་དང་ཁུ་བ་གཉིས་ལས་ཁུ་བའི་ཆ་བརྗེའོ་ཞེས་ ལན་བཏབ་པ་ལྟ་བུ་སྟེ་སྙིང་པོ་མ་མཐོང་ལ། རེས་འགའ་མིང་དོན་གཉིས་ཀ་བརྗེའོ་ཞེས་སོགས་ཀྱང་ལུས་སེམས་གཉིས་ཀའི་འམ་རེ་རེའི་ཡིན་ཞེས་སླར་དྲི་དགོས་སོ། །བདག་ལ་སྲུང་བྱའི་ཆ་དང་སྲུང་བྱེད་ཀྱི་ཆ་གཉིས་ཞེས་པའང་སྤྱིར་རང་རྒྱུད་ ཀྱིས་ཟིན་པའི་ཕུང་པོ་ལྔ་ལ་བདག་གི་འདུ་ཤེས་འཇུག་པ་ཡིན་ལ། དེ་ལ་དེའི་ལུས་སུ་སྣང་བ་གཟུགས་ཕུང་སྲུང་བྱ་དང་གཞན་བཞི་པོ་སྲུང་བྱེད་དུ་འདོད་རྒྱུ་ཡིན་ནམ། བདག་འཛིན་ནི་འདུ་ཤེས་ཡིན་པས་འདུ་ཤེས་ཁོ་ནའི་སྟེང་ནས་བདག་སྡུག་ བསྔལ་ལོ་སྙམ་པ་སྲུང་བྱ་དང༌། བདག་གི་སྡུག་བསྔལ་ཞི་བར་བྱའོ་སྙམ་པ་ལྟ་བུ་སྲུང་བྱེད་དུ་འདོད་དམ། བདག་འཛིན་ལ་མ་ལྟོས་པའི་སྲུང་བྱ་དང་སྲུང་བྱེད་ཀྱི་བདག་ཁས་ལེན་ནམ་ཅི། རེ་རེ་ཞིང་ཡང་མི་རིགས་ཏེ། བདག་འཛིན་ནི་མ་བརྟགས་པར་
