༄༅། །དེ་ཙམ་དུ་རོ་མྱང་བར་བྱེད་པའི་ཕྱིར། གལ་ཏེ་བཤང་གཅི་ནི་མི་གཙང་ཞིང་དྲི་ང་བས་མ་འདོད་དོ་ཞེ་ན། སོ་ཡང་བཙོག་པའི་དྲི་མ་དང་ལྡན་ཞིང༌། ལྕེ་ནི་བད་ཀན་གྱི་ལྗན་ལྗིན་དྲི་ང་བས་རྟག་ཏུ་གཡོགས་པས་མི་གཙང་ བ་ཡིན་ན། དེ་ཅིའི་ཕྱིར་འདོད་དེ། ཁྱོད་མི་གཙང་བ་མི་འདོད་པ་གལ་ཏེ་བདེན་ན་ལྷ་བ་སོབ་སོབ་པོ་རྣམས་ཁྲག་གིས་གང་ཞིང་རྐང་གི་ནང་ན་རྐང་མར་དང༌། སྦུབས་ལྗན་ལྗིན་གྱིས་གང་བ་དེ་ལྟ་བུའི་རུས་པ་དབྱུག་པ་ལྟ་བུ་དང༌། ཟླུམ་པོ་དང༌། ལེབ་མོ་དང༌། སྲབ་ མོ་དང༌། སྟུག་པོ་དང༌། ཆེ་བ་དང༌། ཆུང་བ་སྣ་ཚོགས་པའི་དུམ་བུ་སུམ་བརྒྱ་དང་དྲུག་ཅུ་མིའི་དབྱིབས་སུ་བསྒྲིགས་པ་ལ་རྩ་རྒྱུས་ཀྱི་སྲད་བུས་སྦྲེལ། ཕྱི་རོལ་ཤ་སྣག་མའི་འདམ་གྱིས་ཞལ་བ་ལྟར་བྱུགས་ཤིང་མགོ་བོར་ཀླད་པ། རྒྱབ་ཏུ་གཞུངས་པ། ཁྲུང་ཁྲུང་གི་ནང་དུ་ སྣབས། རོ་སྟོད་དུ་ཁྲག་བར་དུ་མཁྲིས་པ་དང་བད་ཀན་གྱི་ལྗན་ལྗིན། སྨད་དུ་བཤང་གཅི་བླུགས་ཤིང༌། གནས་ཐམས་ཅད་དུ་སྲིན་བུའི་རིགས་བརྒྱད་ཁྲིས་མི་གཙང་བ་འབུས་གཞིགས་པ་ལྟར་ལོང་ལོང་པོར་བྱས་ཤིང༌། ཁྲག་དང༌། ཆུ་སེར་དང༌། རྣག་དང༌། ཞག་ དང༌། རྡུལ་གྱིས་ཀུན་ནས་ཁྱབ་པའི་ཕྱིར། པགས་པའི་སྐྱི་ཤུན་གྱིས་བཏུམས། བུ་ག་རགས་པ་དགུ་དང་ཕྲ་བ་བ་སྤུའི་སྒོ་ཇི་སྙེད་པ་གཏོད་པ་ཐམས་ཅད་ནང་ནས་མི་གཙང་བའི་དྲི་ངད་ལྡན་པའི་རླུང་དང་རླངས་པ་ཀུན་ནས་རྒྱུན་མི་འཆད་པར་འབྱུང་ ཞིང་སྒོ་དགུ་པོ་ལས་རང་རང་གི་དྲི་མ་རྟག་ཏུ་འཛག་ཅིང་བ་སྤུ་ཐམས་ཅད་ལས་རྔུལ་འབྱུང་བ། མགོ་ལ་སོགས་པའི་གནས་ཁ་ཅིག་ཏུ་ཕྱུགས་ཀྱི་སྤུ་ལྟ་བུ་ཁ་ཅིག་ཏུ་རིང་པོ་དང༌། ཁ་ཅིག་ཏུ་ཐུང་ངུར་སྐྱེས་ཤིང་ཐམས་ཅད་ཀྱང་སྲིན་བུའི་སྤུ་ལྟ་བུའི་ བ་སྤུས་ཁྱབ་པ་སྒྲེན་མོར་འགྲོ་ཞིང་འཕྱན་པ་མཐོང་ན་འཇིགས་སུ་རུང་བའི་བློ་སྐྱེ་བ་འདི་ལྟ་བུ་དག་ཅིའི་ཕྱིར་པང་དུ་འཁྱུད། ཁྱོད་ཉིད་ལུས་ཀྱང་འདི་ཁོ་ན་སྟེ་མི་གཙང་བ་ཐམས་ཅད་ཀྱི་འབྱུང་གནས་སུ་རང་གིས་མངོན་སུམ་དུ་མཐོང་
