ལག་ཁང་ཆེན་པོ་སོགས་སུ་གནས་ཤིང་རྒྱལ་པོས་བླ་མར་བྱེད་པ་སོགས་ཀྱི་གནས་བརྟན་ཆེན་པོ་ལ་འབྱུང་བར་ཟད་ལ། འདིར་ནི་དགོན་པ་བ་དང་སྦྱངས་པའི་ཡོན་ཏན་ཅན་གྱི་དབང་དུ་གཙོ་བོར་མཛད་ལ། སྤྱིར་ཉན་ཐོས་ཀྱི་ལྷུང་བཟེད་ ཀྱང་རིན་པོ་ཆེ་ལས་བྱས་པ་བཀག་ནས་ས་དང་ལྕགས་ཁོ་ན་ལས་བྱེད་ལ། རྒྱ་གར་ན་དེ་གཉིས་རྒྱུ་ངན་པར་ལྟ་བའི་ཕྱིར་དང༌། གོས་ངུར་སྨྲིག་ཀྱང་རྒྱ་གར་ན་ཁ་དོག་གི་ཐ་ཆད་དུ་ལྟ་ཞིང་བོར་བ་ཕྱགས་བདར་ཁྲོད་པ་ནི་རོ་རས་ཡིན་པས་སྐྱུག་བྲོ་བས་མི་ལེན་ལ། དམན་པ་ཕྱགས་བདར་ཁྲོད་པ་ཡང་གཞན་གྱིས་ཟླ་བ་བཞིར་ལོངས་སྤྱད་པའི་གོས་ཡིན་པས་རྒྱ་གར་ན་མི་གྲ་མ་རྣམས་རྙིང་པ་དེ་ལྟ་བུ་མི་ལེན་ཞིང༌། ཉིན་རེ་བཞིན་ཡང་རས་གསར་པ་ལ་ལོངས་སྤྱོད་པའི་ཕྱིར་དང༌། སྤྱིར་ཐེག་ཆེན་གྱི་འདུལ་བ་ལ་ཕྱིར་རོལ་ཕྱགས་བདར་ གྱི་ཕུང་པོརོར་བའི་ལྷན་ཚལ་སྣ་ཚོགས་པ་བསྒྲིགས་པ་ལ་ཕྱགས་བདར་ཁྲོད་པར་བཤད་པས་དེ་ལྟ་བུ་སྐྱེ་བོ་རྣམས་ལ་ཕལ་ཆེར་མི་མཁོ་བའི་ཕྱིར་རོ། །དེ་ལྟ་མོད་ཀྱི་དེང་སང་བོད་ཡུལ་ན་ནི་མི་རྣམས་འབྱོར་པ་ཉམས་ཤིང་དབུལ་བས་དེ་ལྟ་བུའི་ གནས་སྐབས་ལས་ཀྱང་འདས་པར་མཐོང་མོད་ཀྱང༌། རེ་ཞིག་འདིར་གཙོ་ཆེ་བའི་ཆ་ནས་བསྔགས་པར་མཛད་ཀྱི་ངེས་བཟུང་དུ་ཁྱབ་མཐའ་བཅས་པ་ནི་མ་ཡིན་ནོ། །དབེན་པའི་གནས་དེ་ལྟ་བུ་ན་ནི་རང་ཉིད་གཅིག་པུར་ཟད་པའི་ཕྱིར། གང་ལ་འཇིགས་ པ་དང་ངོ་ཚ་བའི་ཡུལ་གཞན་མེད་པས་འཇིགས་པའམ། ངོ་ཚའི་གནས་སྲུང་བའི་ཕྱིར། ལུས་སྦ་བའི་སྤྱོད་ལམ་གྲོང་དུ་འཆོས་པ་ལྟ་བུ་ཡང་དགོས་པ་མ་ཡིན་ནོ། །དེ་ལྟར་གནས་སུའི་ཡང་མ་ཡིན་པ་རྣམས་སུ་ཟས་གོས་གང་བྱུང་གིས་ཆོག་ ཤེས་པས་གཡེང་བ་མེད་པར་གཅིག་པུར་སེམས་རྣལ་དུ་ཕེབས་པས་རང་དབང་དུ་གནས་པ་ནི་བདེ་བའི་མཆོག་སྟེ། སྟོན་པ་ཉིད་ཀྱིས་ཀྱང༌། རང་དབང་ཐམས་ཅད་བདེ་བ་སྟེ། །གཞན་དབང་ཐམས་ཅད་སྡུག་བསྔལ་ཡིན། །ཞེས་བཀའ་
