གནས་རྣམས་ནགས་ཀྱིས་ཁྱབ་པ་ཤས་ཆེ་ཞིང་བཅོས་པ་དང་རང་བཞིན་གྱིས་གྲུབ་པའི་རི་ཆུང་ངུ་རེ་རེ་ཙམ་མ་གཏོགས་རི་བོ་ཆེན་པོ་དག་ཉུང་བའི་ཕྱིར། ནགས་ཞེས་གཙོ་ཆེ་བ་སྨོས་པར་ཟད་ཀྱི། ཤིང་ནགས་ཁོ་ན་ལ་ནི་མི་བཟུང་སྟེ་བོད་ལ་སོགས་པ་མཐའ་ འཁོབ་ཀྱི་ཡུལ་གྲུ་རྣམས་ན་རི་བོ་ཆེ་ཞིང་ལྷུན་སྟུག་པ་གངས་རི་དང༌། བྲག་དང༌། གཡའ་དང༌། རྫ་དང༌། སྤང་སོགས་ཤིང་དང་བཅས་པ་དང༌། མ་བཅས་པ་དང་ཆེས་མང་བས་དེ་ལྟ་བུའི་དགོན་པའི་གནས་ཐམས་ཅད་བསྡུ་བའོ། །དེ་དག་ན་ནི་སྐྱེ་བོའི་རྒྱུན་ལུགས་ ཀྱིས་དབེན་པས་བྱ་དང༌། རི་དྭགས་དང༌། ལྗོན་ཤིང་ལ་སོགས་པ་གྲོགས་སུ་ཟད་ལ། དེ་དག་ནི་ངོ་སྲུང་བ་མི་དགོས་ཤིང་སྨོད་པར་མི་བྱེད་པས་འགྲོགས་ན་བདེ་བའོ། །ཅི་དེ་དག་ན་གཅན་གཟན་གཏུམ་པོ་དག་ཡོད་པས་དེ་དག་ནི་འགྲོགས་ན་བདེ་བ་མ་ཡིན་ནོ་ སྙམ་ན། དེ་ལྟ་བུའང་རེས་འགའ་ནི་སྲིད་མོད་ཀྱི་རྣམ་པ་ཀུན་ཏུ་མ་ཡིན་པ་དང༌། བྱང་ཆུབ་སེམས་དཔའ་ནི་ལུས་སྲོག་ལ་ཆགས་པ་མེད་ཅིང༌། སེམས་ཅན་ཐམས་ཅད་ཕ་མ་འདུ་ཤེས་པས་དེའི་དོན་དུ་དབེན་པར་འགྲོ་བའི་ཕྱིར། ཆགས་པ་དང༌། འཇིགས་པ་ མེད་ལ། སེམས་གཡོ་བར་མི་བྱེད་ན་ལུས་ཀྱི་གནས་སྐབས་ཅི་ཐོབ་ཀྱང་སྡུག་བསྔལ་མ་ཡིན་ཏེ། སྡུག་བསྔལ་ནི་ཚོར་བ་ཡིན་ལ། དེ་ནི་ཤེས་པའི་ཆོས་ཡིན་གྱི་བེམ་པོ་ལ་མེད་དོ། །དེ་དག་ཏུ་བྲག་གི་ཕུག་གམ་བྱ་སྐྱིབས་སོགས་དང་སྔོན་ཚངས་པ་ ལ་སོགས་པའི་གཟུགས་བརྙན་བྱས་ཏེ་མཆོད་པ་འཇིག་རྟེན་པའི་ལྷ་ཁང་ཡིན་པ་ལས་ཕྱིས་ཕྱོགས་དེ་སྐྱེ་བོས་དབེན་པས་སྟོང་པར་གྱུར་བའམ། ལྗོན་ཤིང་ཆེན་པོ་ལོ་མའི་སྐྱིབས་ཆེ་ཞིང་གཡུར་ཟ་བས་ཆར་དང་ཉི་མའི་གདུང་བ་དང་རླུང་ལས་སྐྱོབ་པས་ ཁང་བཟང་གི་མཆོག་ལྟ་བུ་ལ་སོགས་པ་རྙེད་པར་སླ་ཞིང་འཆོས་པའི་སྡུག་བསྔལ་མེད་པ་སུས་ཀྱང་བདག་གིར་མ་བཟུང་བས་རྩོད་པ་མེད་པ་རྣམས་སུ་ཅི་ལྟར་བདེ་བས་གནས་ཏེ་གཞན་དབང་གི་ཁོལ་པོ་མ་ཡིན་པས་རང་དབང་དུ་སྤྱོད་ལ། རྒྱབ་ལྟ་བུ་
