༄༅། །ལུས་གཞོན་ཤ་ཅན་ཤིན་ཏུ་རྙི་པར་འགྱུར་ཡང་མི་དགེ་བའི་ལས་ཀྱིས་བསྐྱེད་པའི་ཕྱིར། གཞན་སྐྱུག་བྲོ་བ་དང་མི་མཛེས་པ་དང་འཇིགས་སུ་རུང་བ་སྐྱེད་ཅིང་རྩྭའི་མྱུ་གུས་ཀྱང་ལུས་ལ་ཚེར་མ་ལྟར་འཛུག་པའི་ཟུག་རྔུ་སྐྱེད་པས་ གཟེ་རེག་ཆེ་ཞིང་བདག་ཉིད་སྡུག་བསྔལ་བར་བྱེད་པ་སྟེ་སྦལ་པ་དང་ན་བུན་གྱི་འབུའི་ལུས་ལྟ་བུ་ཡིན་ལ་དམྱལ་བར་ནི་དེ་བས་འབུམ་འགྱུར་གྱིས་ཡང་སོས་ཀྱི་ལུས་རྙི་བ་ནས་མནར་མེད་ཀྱི་བར་དུ་བདུན་འགྱུར་གྱིས་རིམ་པས་རྙི་ཞིང་མི་སྡུག་པར་འགྱུར་ ལ། དེ་ལྟར་དམྱལ་བ་པའི་ལུས་ལས་ངན་གྱིས་བསྐྱེད་པའི་རྙི་ཞིང་གཞོན་ལ་མི་སྡུག་པ་ལ་ཟངས་ཞུན་ཁོལ་མས་སྲེག་ལ། ཡང་སྐད་ཅིག་དེ་ཉིད་དུ་དེ་བས་ཀྱང་རྙི་བའི་ལུས་སུ་འགྱུར་ཞིང་ཡང་སྲེག་པ་སོགས་ལོ་གྲངས་མཐའ་ཡས་པར་དེ་ལྟར་མྱོང་ ངེས་ཀྱི་ལས་བསགས་ནས་ད་ལྟ་རློམ་སེམས་དང་བཅས་ཏེ་བདེ་བའི་ང་རྒྱལ་གྱིས་སྡོད་ནུས་པ་འདི་ཅི་ལྟ་ཞིག་ཏུ་རུང༌། དེས་ན། བརྩོན་འགྲུས་མི་རྩོམ་འབྲས་བུ་འདོད། །གཟེ་རེག་ཆེ་ཡང་གནོད་པ་མང༌། །འཆི་བས་བཟུང་ཡང་ལྷ་ལྟར་ བསྙེམས། །ཀྱེ་ཧུད་སྡུག་བསྔལ་གྱིས་བཅོམ་ཁྱོད། །ཅེས་རང་ལ་ཁྲེལ་གདའ་བ་སྟེ་འདི་ལྟར་འབྲས་བུ་འདོད་ལ་བརྩོན་འགྲུས་མི་རྩོམ་པ་ནི་འགལ་ལོ་ཞེས་སོགས་ཀྱི་དོན་ཅན་ནོ། །དེས་ན་དལ་འབྱོར་གྱི་གྲུ་དང་དགེ་བའི་བཤེས་གཉེན་གྱི་ མཉན་པར་འཛོམ་པའི་དུས་འདིར་སེམས་ཁྱོད་སྡུག་བསྔལ་གྱི་ཆུ་བོ་འདི་ལས་རྒོལ་ཞིག་སྟེ་གྲུ་དང་མཉན་པ་འདི་ལྟ་བུ་ཕྱིས་མི་རྙེད་པས་ད་ལྟ་ཁོ་ན་ཆུ་བོ་ལས་རྒལ་དགོས་ཏེ་ཅུང་ཟད་ཀྱང་ལེ་ལོ་བྱ་བའི་དུས་ནི་འདི་མ་ཡིན་ནོ། །བཞི་པ་ངན་ཞེན་གྱི་ལེ་ ལོ་སྤང་བ་ནི། དགའ་བའི་རྒྱུ་ནི་མཐའ་ཡས་པའི། །དམ་ཆོས་དགའ་བའི་མཆོག་སྤངས་ནས། །སྡུག་བསྔལ་རྒྱུ་ཡི་གཡེང་བ་དང༌། །རྒོད་སོགས་ལ་ཁྱོད་ཅི་ཕྱིར་དགའ། །ཞེས་གསུངས་ཏེ། དུས་སྟོན་དང༌། གླུ་གར་དང༌། མགྲོན་དུ་བོད་
