༄༅། །བསྐྱེད་པའོ། །དེ་ལྟར་ཤེས་པ་ན་ཆུ་ལས་ལྦུ་བ་དང་མེ་ལས་དུ་བ་ལྟར་མེད་བཞིན་དུ་རྒྱུ་རྐྱེན་ཙམ་དུ་སྣང་བའི་ཆོས་འདི་ཐམས་ཅད་སྤྲུལ་པའམ་སྒྱུ་མ་ལྟར་རིག་སྟེ་གང་ལ་ཁྲོ་བར་བྱ་བའི་ཡུལ་དང་གང་གིས་ཁྲོ་བར་བྱེད་པའི་བདག་
ཀྱང་མི་མཐོང་བ་དེའི་ཚེ་ཆོས་གང་ལ་ཡང་ཁྲོ་བར་མི་འགྱུར་རོ། །འགྲེལ་ཆེན་ལས་ནི། དོན་དམ་པར་སུ་ཞིག་སུ་ལ་གནོད་པ་བྱེད་དེ་བས་ན་གནོད་པ་བྱེད་པོ་གང་ལ། གནོད་པ་བྱས་པ་གང་ཞིག །གང་དུ་ཞེ་སྡང་བར་འགྱུར་ཞེ་ན། མྱ་ངན་འདས་འདྲའི་དངོས་ཀུན་ལ། །
དེ་ལྟར་ཤེས་ན་སུ་ཞིག་ཁྲོ། །ཞེས་གཞུང་བཏོན་ནས་འབྲུ་གཉེར་ཏོ། །
གསུམ་པ་སྤྲུལ་པ་ལྟ་བུ་ཡིན་ན་ཁྲོ་བ་ཟློག་མི་རིགས་པའི་རྩོད་པ་སྤང་བ་ནི། གང་གིས་གང་ཞིག་བཟློག་བྱ་སྟེ། །བཟློག་པའང་རིགས་པ་མིན་ཞེ་ན། །དེ་ལ་བརྟེན་ནས་སྡུག་བསྔལ་རྣམས། །རྒྱུན་ཆད་འགྱུར་འདོད་མི་རིགས་མེད། ། ཅེས་གསུངས་ཏེ། འོ་ན་ཐམས་ཅད་སྤྲུལ་པ་ལྟ་བུ་ཡིན་ན་ཟློག་པ་པོ་གང་གིས་བཟློག་བྱ་གང་ཞིག་བཟློག་པར་བྱ་བཟློག་བྱ་དང་ཟློག་བྱེད་གང་ཡང་མེད་པའི་ཕྱིར། །དེས་ན་ཁྲོ་བ་ཟློག་པའང་རིགས་པ་མིན་ནོ་ཞེ་ན། བཟློག་བྱའི་ཁྲོ་བ་དང༌། ཟློག་བྱེད་ཀྱི་གཉེན་པོ་དང་། ཟློག་པ་པོའི་གང་ཟག་རྣམས་ངོ་བོ་ཉིད་ཀྱིས་ཡོད་པ་ནི་མ་ཡིན་ཡང་ཐག་ཁྲ་ལ་སྦྲུལ་འཛིན་གྱི་བློས་བྲོས་པ་ན་གཡང་དུ་ལྷུང་ནས་སྡུག་བསྔལ་བར་བྱེད་པ་ལྟར་གློ་བུར་དུ་བྱུང་བའི་ཁྲོ་བ་འདིས་ངན་སོང་གི་གཡང་དུ་ལྷུང་བར་བྱེད་ལ། སྦྲུལ་འཛིན་གྱི་བློ་ལོག་པ་ན་འཇིགས་ པ་མེད་པ་ལྟར་ཁྲོ་བ་རང་བཞིན་མེད་པའི་གློ་བུར་བ་དེ་ཉིད་གཉེན་པོ་རང་བཞིན་མེད་པའི་གློ་བུར་བས་བཟློག་པ་དེ་ལ་བརྟེན་ནས་འབྲས་བུ་ངན་སོང་དང་མཐོང་ཆོས་ཀྱི་སྡུག་བསྔལ་རྣམས་རྒྱུན་འཆད་པར་འགྱུར་ལ། དེའི་ཕྱིར་ཐག་ཁྲ་ཡིན་གྱི་སྤྲུལ་མ་ཡིན་ནོ། །ཞེས་སྟོན་པ་ལྟར་ ཁྲོ་བ་ཟློག་པར་འདོད་པའི་ཕྱིར་འདི་ལ་མི་རིགས་པ་མེད་དོ། །འགྲེལ་ཆེན་ལས་ནི། འཐུག་འཇུག་པ་མི་རིགས་ན་ཟློག་པའང་མི་རིགས་སོ་ཞེ་ན། དེ་ལ་སོགས་ཏེ་ཆོས་ཐམས་ཅད་བྱེད་པ་མེད་པ་ཡིན་མོད་ཀྱི་དེ་ལྟ་ན་ཡང་རྟེན་ཅིང་འབྲེལ་བར་འབྱུང་བའི་སྟོབས་ཀྱིས་གཞན་
