༄༅། །ཆོས་ཉིད་དུ། །བདེ་བར་གཤེགས་པས་ཆོས་ཀུན་བསྟན་པར་མཛད། །ཅེས་དང་། གང་དག་དེ་བཞིན་འདི་དག་འདུས་བྱས་ཏེ། །གཅིག་ཤོས་འདུས་མ་བྱས་ཞེས་རྣམ་གཉིས་སྨྲ། །དེ་དག་བདེ་གཤེགས་བསྟན་པའི་ཆོས་རྣམས་ལ། ། ནན་ཏན་དགྱི་བར་སྤྲོ་བའི་མི་མ་ལགས། །འདི་ན་མི་གཉིས་ཆོས་ཞེས་གང་སྨྲ་བ། །དེ་དག་སྟོན་པའི་བཀའ་ལ་མི་གནས་ཏེ། །བདེ་བར་གཤེགས་པས་ཆོས་རྣམས་གང་བསྟན་པ། །དེ་ལ་གཉིས་དང་མི་གཉིས་ཆོས་མ་མཆིས། །ཞེས་དང་། རྒྱ་མཚོའི་མདོ་ ལས། རྐྱེན་ལས་སྐྱེས་པ་གང་ཡིན་དེ་མ་སྐྱེས། །དེ་ལ་སྐྱེ་བ་ངོ་བོ་ཉིད་ཀྱིས་མེད། །རྐྱེན་ལ་རག་ལས་གང་ཡིན་སྟོང་པར་གསུངས། །སྟོང་ཉིད་གང་ཤེས་དེ་ནི་བག་ཡོད་པའོ། །ཞེས་དང་། དྲི་མ་མེད་པར་གྲགས་པའི་མདོ་ལས། གཟུགས་ཉིད་སྟོང་པ་སྟེ་ གཟུགས་བཤིག་པས་སྟོང་པ་མ་ཡིན་གྱི་གཟུགས་ཀྱི་རང་བཞིན་སྟོང་པའོ་ཞེས་སོགས་ཕུང་པོ་ལྔ་ཀ་ལ་སྦྱར་བ་དང་། རྔ་བོ་ཆེའི་མདོ་ལས། དེ་ནི་སེམས་དང་བྱང་ཆུབ་ཀྱང་། །རྣམ་པ་གཉིས་སུ་མི་མཐོང་སྟེ། བྱང་ཆུབ་ཀྱི་ནི་མཚན་ཉིད་གང་། ། སེམས་ཀྱང་དེ་ཡི་མཚན་ཉིད་ཡིན། །ཞེས་དང་། ཆོས་ཐམས་ཅད་འབྱུང་བ་མེད་པར་བསྟན་པའི་མདོ་ལས། བྱང་ཆུབ་འདོད་ཆགས་ཉིད་ནི་གཉིས་སུ་མེད། །འཇུག་པ་གཅིག་པ་མཉམ་ཉིད་ལྡན་པ་སྟེ། །འདི་དག་ཆོས་ལ་བྱིས་པ་གང་འཇིགས་ པ། །དེ་དག་སངས་རྒྱས་བྱང་ཆུབ་རིང་བ་ཡིན། །ཞེས་དང་། ཆོས་ཡང་དག་པར་སྡུད་པའི་མདོར། སྟོང་ཉིད་དང་ཉོན་མོངས་པ་ནི་མི་གཉིས་ཏེ་གཉིས་སུ་དབྱེར་མ་མཆིས་སོ་ཞེས་སོགས་རྒྱ་ཆེར་གསུངས་པའི་ཕྱིར། ཇི་ལྟར་སྣང་ཙམ་གྱི་ཆོས་ལ་བརྗོད་ ཚུལ་དང་མཐོང་བ་པོ་དང་འཛིན་ཚུལ་གྱི་ཆ་ནས་བདེན་པ་གཉིས་སུ་བཞག་པར་ཟད་ཀྱི་དེ་ནི་དུང་དང་དཀར་པོ་ལྟར་གཅིག་པ་དང་ཐ་དད་པ་གང་དུ་ཡང་གདགས་པར་མི་ནུས་ཏེ་ཡང་དག་པར་ན་གཅིག་ཐ་དད་ཉིད་རང་གི་ངོ་བོ་ཉིད་ཀྱིས་མི་དམིགས་པའི་ཕྱིར་དང་།
