བདེ་བླག་ཏུ་འགྲུབ་ཕྱིར་ཡུལ་མཆོག་ལ་འདུད་པ་སྔོན་དུ་གཏོང་བ་ལྟར་འདིར་ཡང་བསྟན་བཅོས་བསྒྱུར་བའི་བར་ཆད་ཞི་ཞིང་འགྱུར་མཐར་ཕྱིན་པ་སོགས་དགོས་པ་ཁྱད་པར་ཅན་གྱི་ཕྱིར་འགྱུར་ཕྱག་མཛད་པ་ཡིན་ལ། སངས་རྒྱས་བྱང་སེམས་ལ་ཕྱག་མཛད་པ་ཡང་འདི་ ཉིད་སྤྱིར་ཐེག་པ་ཆེན་པོའི་སྡེ་སྣོད་མཐའ་དག་གི་དགོངས་འགྲེལ་ཡིན་ཡང་གཙོ་བོར་ཐེག་ཆེན་མདོ་སྡེའི་དགོངས་འགྲེལ་དུ་ཤེས་པར་བྱ་བའི་ཕྱིར་རོ། །དེ་ནི་སྡེ་སྣོད་ངོས་འཛིན་གྱི་ཕྱག་གམ་ཆོས་རྒྱལ་བཀས་བཅད་ཀྱི་ཕྱག་སྟེ། སྔོན་ཆོས་རྒྱལ་རྣམས་ཀྱི་བཀའ་བཞིན་དུ་ལོ་ཙཱ་ བདག་གིས་འདུལ་བའི་སྡེ་སྣོད་དུ་གཏོགས་པ་ཡིན་ན་ཐམས་ཅད་མཁྱེན་པ་ལ་ཞེས་དང་། མདོ་སྡེར་གཏོགས་པ་ལ་སངས་རྒྱས་བྱང་སེམས་ལ་དང་། མངོན་པའི་ཕྱོགས་ལ་འཇམ་དཔལ་གཞོན་ནུར་གྱུར་པ་ལ་འགྱུར་ཕྱག་མཛད་པ་ཡིན་པར་བཤད་པ་ལྟར་རོ། །འོན་ ཀྱང་ཕྱི་ནས་ལོ་ཙཱ་བ་རྣམས་ཀྱིས་གཞུང་རང་རང་གི་བརྗོད་བྱ་དང་མཐུན་པའི་ལྷ་འམ་རང་གང་ལ་དད་པའི་ལྷག་ལྷ་ལྟ་བུ་ལ་ཕྱག་མཛད་པས་མ་ངེས་པར་བཤད་དོ། །
གཉིས་པ་མཚན་དེ་ལྡན་གྱི་བསྟན་བཅོས་དངོས་བཤད་པ་ལ་གསུམ། བསྟན་བཅོས་རྩོམ་པ་ལ་འཇུག་ པའི་རྒྱུ། བརྩམས་པའི་བསྟན་བཅོས་ལུས་ཀྱི་རང་བཞིན་དངོས། མཇུག་ཡོངས་སུ་རྫོགས་པའི་བྱ་བའོ། །
དང་པོ་ལ་བཞི་ལས།
དང་པོ་མཆོད་པར་བརྗོད་པ་ནི། བདེ་གཤེགས་ཆོས་ཀྱི་སོགས་ཏེ། དེ་ལའང་། དགོས་དོན། བསྡུས་དོན། ཚིག་དོན་གསུམ་ལས།
དང་པོ་ལ་
རང་དོན་གྱི་དགོས་པ་ནི། འཇིག་རྟེན་ན་སྐྱེས་བུ་དམ་པ་དག་བྱ་བ་ཁྱད་པར་ཅན་ལ་འཇུག་པ་ན་ཐོག་མར་རང་གང་ལ་དད་པའི་ལྷ་ལ་ཕྱག་བྱས་ནས་བྱ་བ་དེ་ལ་འཇུག་པ་བཞིན་དུ། སློབ་དཔོན་ཉིད་ཀྱིས་ཀྱང་གཞུང་རྩོམ་པའི་དང་པོར་ཡུལ་ཁྱད་པར་ཅན་མཆོག་གསུམ་
