ཁྱོད་འདོད་ན་འདི་ཟོ་ཞིག་ཅེས་དེས་དེ་ཙམ་དུ་དགེ་སློང་དུང་བ་དེས་པ་གཞན་དག་ལ་བརྙས་པར་བྱེད་དོ་ཞེས་གསུངས་ཏེ། གང་རྙེད་བཀུར་དང་བཟའ་བཏུང་སོགས་ཅུང་ཟད་རེ་བྱུང་བས་ང་རྒྱལ་དང་རྒྱགས་པ་སྐྱེས་ནས་གཞན་ལ་ངོམས་ཤིང་བརྙས་པར་བྱེད་པ་དག་གིས་འདི་དག་ སེམས་པ་གལ་ཆེ་བར་གསུངས་སོ། །དེ་ལྟར་རྙེད་བཀུར་གྱིས་སེམས་ཁེངས་པ་དང་དེ་ལ་ཆགས་པས་རོ་མྱང་བ་ལས་འཇིགས་པ་སྐྱེ་བའི་རྒྱུ་མཚན་དེ་ལྟ་བས་ན་བདེ་སྡུག་གི་རྒྱུ་ལ་རྣམ་པར་རྨོངས་པའི་ཡིད་ཁྱོད་ཀྱིས་ད་ལྟའི་དུས་སུ་སྡུག་བསྔལ་གྱི་རྒྱུའི་རྙེད་བཀུར་ལ་བདེ་བའི་ རྒྱུར་རློམ་ནས་དེ་དག་གང་དང་གང་ལ་ཆགས་ཤིང་ཞེན་པར་གྱུར་ནས་དད་པས་བྱིན་པ་སོགས་ལ་ཇི་ཙམ་ལོངས་སྤྱོད་པ་དེ་དང་དེ་བསྡོངས་ཞེས་ཏེ་དེ་དང་དེའི་ནུས་པ་ཕྱོགས་གཅིག་ཏུ་བསྡོངས་པའམ་བསྡོམས་པ་ལས་འབྲས་བུ་རྣམ་སྨིན་མྱོང་བའི་དུས་སུ་གོང་ནས་གོང་དུ་བརྒྱ་ འགྱུར་སྟོང་འགྱུར་དུ་འཕེལ་ནས་སྡུག་བསྔལ་ཉིད་དུ་འགྱུར་ཞིང་ལྡང་ངོ༌། །དེ་བས་ན་བདེ་སྡུག་གི་རྒྱུའི་བླང་དོར་ལ་མཁས་པས་ནི་རྙེད་བཀུར་སོགས་ལ་ཆགས་པར་མི་བྱ་སྟེ་དེ་དག་ལ་ཆགས་ཤིང་ཞེན་པ་དེ་ལས་ནི་འདི་ཕྱི་ཀུན་ཏུ་འཇིགས་པ་མི་བཟད་པ་སྐྱེ་བ་བཤད་མ་ཐག་པ་ དེའི་ཕྱིར་རོ༑༑ཞེས་ཡུལ་ཅན་ཆགས་པའི་ཉེས་པ་བསྟན་ཏོ། །དེ་དང་དེ་བསྡོངས་ཞེས་པ་ནི་རྙེད་སོགས་སྡུག་བསྔལ་དང་སྡུག་བསྔལ་གྱི་རྒྱུར་གྱུར་པའོ་ཞེས་ཀྱང་བཤད་དོ། །འབྲས་བུ་རྣམ་པར་སྨིན་པའི་དུས་སུ་སྟོང་འགྱུར་དུ་འཕེལ་ནས་སྡུག་བསྔལ་ཉིད་དུ་འགྱུར་ཞིང་ ལྡང་བ་ནི་འདུལ་བའི་མདོར། ལེ་ལོ་ཅན་ལ་ནི་བླངས་པ་དང་ཉེ་བར་སྤྱད་པ་བུ་ལོན་དུ་འགྱུར་རོ་ཞེས་ཚུལ་ཁྲིམས་རྣམ་པར་དག་ཀྱང་ཐོས་བསམ་སོགས་ལ་མི་བརྩོན་ཞིང་བསླབ་པ་ཡོངས་སྦྱོང་གི་ཐབས་ལ་བརྟེན་ནས་བསླབ་པ་གོང་འཕེལ་དུ་སྒྲུབ་མི་ནུས་པའི་ལེ་ལོ་ཅན་ནི་བླངས་
