༄༅། །སོགས་གསུངས་ལ། འགྲེལ་པ་གཞན་ཐམས་ཅད་ཀྱིས་ནི་ཚིགས་བཅད་སྔ་ཕྱི་གཉིས་ཀ་མདོར་བསྟན་གྱི་གཞུང་དུ་བཀྲལ་ལོ། །འོན་ཀྱང་ཡང་ཟློས་བྱས་པ་ལྟ་བུ་ཞིག་འདུག་ལ། བུ་སྟོན་གྱིས་ཀྱང་སྔར་གྱི་སྒྱིད་ལུག་མེད་ དང་སོགས་ཀྱི་ཚིགས་བཅད་དང་འདིའི་ཚིགས་བཅད་གཉིས་པོ་མེད་ན་གཞུང་འབྲེལ་ཆགས་ཤིང་མཛེས་པ་ཞིག་འབྱུང་ཞེས་གསུངས་ལ། བོད་འགྲེལ་ཁ་ཅིག་ཏུ་འདིའི་ཚིགས་བཅད་སྔ་ཕྱི་གཉིས་པོ་གོང་འོག་བསྣོར་ནས་བཤད་པའང་ཡོད་པར་གསུངས་ སོ། །དེས་ན་མདོར་བསྟན་གྱི་གཞུང་དངོས་ནི་འདི་ཡིན་ཏེ། དེ་ལྟར་བརྩོན་འགྲུས་ཀྱི་མི་མཐུན་ཕྱོགས་དགེ་བའི་ཆོས་སྒྲུབ་ནུས་སུ་མཐོང་ཡང་མི་འཇུག་པའི་སྙོམ་ལས་ཀྱི་ལེ་ལོ་དང་བྱ་བ་ངན་ཞེན་གྱི་ལེ་ལོ་དང་བདག་གིས་དེ་འདྲ་སྒྲུབ་ག་ལ་ནུས་སྙམ་ དུ་ཞུམ་སྟེ་མི་འཇུག་པའི་བདག་ཉིད་བརྙས་པའི་ལེ་ལོ་རྣམས་སྤངས་ཏེ། མཐུན་རྐྱེན་བརྩོན་འགྲུས་སྤེལ་བའི་ཐབས་མོས་པ་སྟེ་འདུན་པའི་དཔུང་དང༌། ང་རྒྱལ་སྟེ་བརྟན་པའི་དཔུང་དང་། དགའ་བའི་དཔུང་དང་དོར་བའི་དཔུངསྟེ་སྦྱོར་བ་དཔུང་ཚོགས་ བཞི་བསྐྱེད་ལ། དངོས་གཞི་དྲན་ཤེས་ཀྱིས་བརྩོན་འགྲུས་ལྷུར་ལེན་པའི་སྟོབས་དང་། རྗེས་ལུས་སེམས་ལ་དབང་བསྒྱུར་བའི་སྟོབས་ཀྱིས་ནི་བརྩོན་འགྲུས་གོང་ནས་གོང་དུ་སྤེལ་བའི་ཕྱིར་དུ་འབད་པར་བྱའོ། །དེ་ལྟར་དཔུང་བཞི་དང་སྟོབས་ གཉིས་བྱས་ཀྱང་ཆོག་ལ། །ཡང་ན་དཔུང་དྲུག་གམ་སྟོབས་དྲུག་ཅེས་བྱས་ཀྱང་ཆོག་སྟེ་སྟོབས་དང་དཔུང་སྐད་དོད་གཅིག་པར་བཤད་པའི་ཕྱིར་རོ། །དེ་ལྟར་དཔུང་བཞིའི་དང་པོ་མོས་པའི་དཔུང་ཞེས་པའི་མོས་པ་ནི་སེམས་བྱུང་འདུན་པ་ལ་བྱ་དགོས་
