ཕྱོགས་འཇོམས་པ་དང་སེམས་ཅན་གྱི་དོན་འགྲུབ་པར་བྱ་བའི་ཕྱིར་དུ་དཔུང་ཚོགས་བཞི་དང་ལྡན་པའི་གཉེན་པོ་བརྩོན་འགྲུས་ཀྱི་སྟོབས་བསྐྱེད་པར་བྱ་བ་ལ། ལས་འབྲས་བསམ་སྟེ་དེའི་བླང་དོར་ཚུལ་བཞིན་དུ་བྱེད་པ་ལ་འདུན་པ་བསྐྱེད་པ་མོས་པའི་སྟོབས་ མ་བརྟགས་པར་ཅི་རུང་རུང་ལ་མི་འཇུག་ལ་བརྟགས་ནས་ཞུགས་ཤིང་བརྩམས་པ་དེ་མཐར་ཕྱིན་པར་བྱེད་པ་བརྟན་པའི་སྟོབས། བྱིས་པ་རྩེད་མོ་ལ་འཇུག་པ་ལྟར་འཕྲོ་མི་གཅོད་པར་ངོམས་པ་མེད་པར་སྤྲོ་བཞིན་དུ་དམ་པའི་ལས་ལ་བརྩོན་འགྲུས་རྩོམ་ པ་དགའ་བའི་སྟོབས། །བརྩོན་འགྲུས་བརྩམས་པས་ལེགས་པར་ཟིན་པ་དེ་དོར་བའམ་ལུས་སེམས་དུབ་པས་མི་ནུས་ན་རེ་ཞིག་ངལ་བསོས་ཏེ་སོས་མ་ཐག་ནས་སླར་རྩོམ་པ་དོར་བའི་སྟོབས་དང་བཞི་ནི་བརྩོན་འགྲུས་ཀྱི་མཐུན་རྐྱེན་ཡིན་ནོ། །དེ་ལྟར་བཞི་ ལས་མོས་པའི་སྟོབས་བསྐྱེད་ཚུལ་ནི། མོས་པ་སྟེ་འདུན་པའི་སྟོབས་ནི་མི་དགེ་བའི་འབྲས་བུ་འཁོར་བའི་སྡུག་བསྔལ་སྣ་ཚོགས་པ་བསམ་པས་འཇིགས་པ་དང༌། མདོ་རྒྱན་ལས། བསོད་ནམས་ཆེ་དང་འགྱོད་པ་མེད། །ཡིད་བདེ་བ་དང་བདེ་བ་ཆེ། ཞེས་མོས་པའི་ཕན་ཡོན་བཅུ་གསུངས་པ་དང༌། འདིར་དགེ་བའི་ཕྱོགས་ཐམས་ཅད་ཀྱི་རྩ་བ་ཡིན་པར་གསུངས་པ་སོགས་མོས་པ་དེ་ཡི་ཕན་ཡོན་རྣམས་ཡང་ཡང་ལེགས་པར་བསམ་པས་འདུན་པ་བསྐྱེད་པར་བྱའོ། །བི་བྷཱུ་ཏིས། ཚིགས་བཅད་འདི་སྐབས་ སུ་མ་བབས་པས་གཞན་གྱིས་བཅུག་པ་ཡིན་ཏེ། བརྩོན་འགྲུས་ཀྱི་མི་མཐུན་ཕྱོགས་སྤངས་ནས་བརྩོན་འགྲུས་འཕེལ་ཕྱིར་དཔུང་བཞི་ལ་འབད་པར་བྱ་ཞེས་པའི་མདོར་བསྟན་གྱི་དོན་ནི་ཚིགས་བཅད་འོག་མས་སྟོན་པས་འདི་མི་དགོས་པའི་ཕྱིར་ཞེས་
