༄༅། །སུས་ནུས་སྙམ་དུ་ཞུམ་པ་ཡིན་ལ། དེ་སྙམ་དུ་ཞུམ་པར་ཡང་བྱ་མི་རིགས་ཏེ་དུས་ཡུན་རིང་བ་ཙམ་སྐྱོ་བ་སྐྱེ་བའི་རྒྱུ་མིན་པས་སོ། །དེ་ཡང་འདི་ལྟར་སྡུག་བསྔལ་མྱོང་ཚབས་ཆེ་ན་དུས་ཐུང་ངུ་ལའང་སྐྱོ་བ་སྐྱེ་ལ་སྡུག་བསྔལ་མེད་ཅིང་ བདེ་བར་གནས་ན་དུས་རིང་ཡང་སྐྱོ་བ་འབྱུང་བའི་དོན་མེད་དེ། རིན་ཆེན་ཕྲེང་བ་ལས། སྡུག་བསྔལ་བ་ལ་དུས་ཐུང་ཡང་། །བཟོད་དཀའི་ཡུན་རིང་སྨོས་ཅི་དགོས། །སྡུག་བསྔལ་མེད་ཅིང་བདེ་བ་ལ། །མཐའ་ཡས་དུས་ཀྱང་ཅི་ཞིག་གནོད། ཅེས་དང༌། དེ་བས་སངས་རྒྱས་རིང་ཐོགས་ཤེས། །བློ་དང་ལྡན་པ་སྐྱིད་མི་ལུག །ཉེས་ཟད་ཡོན་ཏན་དོན་དུ་ནི། །འདི་ལ་རྟག་ཏུ་འབད་པར་བྱ། །ཞེས་གསུངས་པ་ལྟར་རོ། །དེའང་བྱམས་སྙིང་རྗེ་དང་བྱང་ཆུབ་ཀྱི་སེམས་ཤུགས་དྲག་གིས་ ཡིད་དབང་མེད་དུ་བསྐྱོད་ནས་དུས་ཐུང་ངུ་ཞིག་ལ་སེམས་ཅན་གྱི་དོན་དུ་སངས་རྒྱས་ཐོབ་ན་སྙམ་པ་ཡིན་ན་ངོ་མཚར་ཆེ་ཡང་དེ་ལྟར་མིན་པར་དུས་ཤིན་ཏུ་རིང་མོར་སྤྱོད་པ་མཐའ་ཡས་པ་ལ་དཀའ་སྤྱད་ཀྱིས་སློབ་དགོས་པར་མཐོང་བ་ན་དེ་སུས་ནུས་ སྙམ་དུ་སྐྱོ་ཞིང་ཡིད་འབྱུང་སྐྱེས་ནས་ཉེ་ལམ་གཞན་ཞིག་ཚོལ་བ་སྐད་བྱེད་པ་ནི་ས་སྨོན་སེམས་ལ་བརྒྱུད་ནས་གནོད་ཅིང་འཇུག་སེམས་ལ་དངོས་སུ་གནོད་པ་ཐེག་ཆེན་གྱི་རིགས་ཀྱི་ནུས་པ་ཇེ་དམན་དུ་སོང་ནས་འཚང་རྒྱ་བ་ལ་ཆེས་རིང་དུ་འགྲོ་བར་ གསུངས་པས་དེ་ལྟ་བུའི་ཁྱད་པར་འབྱེད་པ་ཤིན་ཏུ་གལ་ཆེ་ལ། གཞན་ཡང་དུས་ཤིན་ཏུ་རིང་བར་རྒྱལ་སྲས་ཀྱི་སྤྱོད་པ་དཔག་ཏུ་མེད་པ་ལ་དཀའ་སྤྱད་མཐའ་ཡས་པས་སློབ་དགོས་པར་མཐོང་བ་ལ་བརྟེན་ནས་བྱང་ཆུབ་ཀྱི་སེམས་ཀྱི་སྟོབས་ཆེས་ཆེར་རྒྱས་པར་
