༄༅། །དང་ལམ་ཉམས་སུ་ལེན་པའི་དུས་ཀྱི་དཀའ་སྤྱད་ཀྱི་སྡུག་བསྔལ་ནི་ཡང་ཞིང་ཡུན་ཐུང་ལ་དོན་ཆེན་པོ་བྱང་ཆུབ་འགྲུབ་པའི་དགོས་པ་ཡོད་པས་དེ་ལྟ་བུའི་ཁྱད་པར་ལ་ལེགས་པར་དཔྱད་ན་འཇིགས་མི་དགོས་པ་དཔེ་དང་བཅས་ བསྟན་ཏོ། །དཔེ་ཙམ་གྱི་སྡུག་བསྔལ་ཡང་མེད་པ་ནི། ཐ་མལ་གྱི་ནད་ཀྱི་སྡུག་བསྔལ་ཙམ་བསལ་བའི་དོན་དུ་གཏར་སྲེག་སོགས་ཀྱི་ཆོ་ག་རྩུབ་མོ་བྱེད་པའི་གསོ་དཔྱད་ཕལ་བ་འདི་འདྲ་བ་ཡི་སྡུག་བསྔལ་མྱོང་དགོས་པ་ཙམ་ཡང་སྨན་པ་མཆོག་རྫོགས་པའི སངས་རྒྱས་དག་གིས་ཉོན་མོངས་པའི་ནད་གསོ་བའི་དོན་དུ་མ་མཛད་དེ། ཆོ་ག་འམ་ཉེ་བར་སྤྱོད་པ་ཤིན་ཏུ་འཇམ་པོ་འདོད་པ་བསོད་ཉམས་ཀྱི་མཐའ་དང་ངལ་ཞིང་དུབ་པའི་མཐའ་གཉིས་སྤངས་པའི་ལམ་བདེ་བ་ཐེག་པ་བདེ་བ་འཇུག་པ་བདེ་བའི་ དམ་པའི་ཆོས་ཀྱི་སྨན་ཆེན་པོ་ཉེ་བར་བསྟེན་པའི་ཐབས་ལ་གོམས་པར་བྱས་པ་ཡིས་འཁོར་བ་དང་ངན་སོང་གི་སྡུག་བསྔལ་གྱི་ཟུག་རྔུ་རྩུབ་མོ་མཐའ་དག་སྐྱེད་བྱེད་ཀྱི་རྒྱུར་གྱུར་པའི་ཆགས་སོགས་ཉོན་མོངས་པའི་ནད་ཆེན་པོ་དཔག་ཏུ་མེད་པས་ དུས་རིང་མོ་ནས་ཟིན་པའང་གསོ་བར་མཛད་དེ་འབྲས་བུ་བདེ་བའི་མཆོག་རྫོགས་པའི་སངས་རྒྱས་ཀྱི་གོ་འཕང་བླ་ན་མེད་པ་ཐོབ་པའི་ཐབས་སྟོན་པར་མཛད་དོ་ཞེས་པ་སྟེ་འདིས་འཁོར་བའི་སྡུག་བསྔལ་ཆེན་པོ་བསལ་བ་ལ་ཐ་མལ་བའི་ནད་བསལ་བའི་ སྡུག་བསྔལ་ཙམ་ཡང་དང་དུ་བླང་མི་དགོས་པར་ཆོ་ག་ཤིན་ཏུ་འཇམ་པོས་གསོ་བར་མཛད་ཅེས་བསྟན་ཏོ། །ཡང་གཏར་སྲེག་སོགས་རྩུབ་མོས་ནད་ཞི་བར་བྱེད་པའི་གསོ་དཔྱད་པ་ལ་བའང་འདྲ་བ་ཙམ་ཡང་སྨན་པ་མཆོག་གིས་ལས་དང་པོ་བ་ལ་
