ནས་གོང་དུ་སྤེལ་བ་ལ་གསུམ། བརྩོན་འགྲུས་ཀྱི་ལེའུ། བསམ་གཏན་གྱི་ལེའུ། ཤེས་རབ་ཀྱི་ལེའུའོ། །
དང་པོ་བརྩོན་འགྲུས་ཀྱི་ལེའུ་ལ་གཉིས། ལེའུའི་གཞུང་། ལེའུའི་མཚན་ནོ།
དང་པོ་ལ་གཉིས། བརྩོན་འགྲུས་རྩོམ་དགོས་པའི་རྒྱུ་མཚན་མདོར་ བསྟན་པ། བརྩོན་འགྲུས་ཇི་ལྟར་རྩོམ་ཚུལ་རྒྱས་པར་བཤད་པའོ། །
དང་པོ་ནི། དེ་ལྟར་བཟོད་པས་སོགས་ཏེ། གོང་དུ་བཤད་པ་དེ་ལྟར་གཞན་གྱིས་གནོད་པ་དང་དཀའ་སྤྱད་རྒྱུ་ཆེན་པོ་ལ་བཟོད་པ་དང་ལྡན་པས་བྱང་ཆུབ་མྱུར་དུ་སྒྲུབ་པའི་ཕྱིར་དུ་བརྩོན་འགྲུས་ བརྩམ་པར་བྱ་དགོས་སོ་ཞེས་མཚམས་སྦྱར་ནས་བརྩོན་འགྲུས་རྩོམ་པར་བསྐུལ་བ་སྟེ། དེ་ཡང་བཟོད་པ་མེད་ན་ཐོས་སོགས་ལ་བརྩོན་འགྲུས་བརྩམས་ནས་འཇུག་མི་ནུས་པའམ་ཞུགས་ཀྱང་ཆུད་འཛའ་བར་འགྱུར་བའི་ཕྱིར་ཏེ། བསླབ་བཏུས་སུ། བཟོད་བྱ་ཐོས་པ་ བཙལ་བར་བྱ། ཞེས་གསུངས་པ་ལྟར་རོ། །འོ་ན་བཟོད་པས་ཆོག་གི་བརྩོན་འགྲུས་རྩོམ་ཅི་དགོས་ཤེ་ན། དགོས་པའི་རྒྱུ་མཚན་འདི་ལྟར་རྒྱལ་སྲས་ཀྱི་སྤྱོད་པ་རྣམས་ལ་སྤྲོ་བས་འཇུག་པའི་བརྩོན་འགྲུས་དང་ལྡན་པ་དེ་ལ་འབྲས་བུ་བྱང་ཆུབ་ཆེན་པོ་གནས་པའམ་འབྱུང་ སྟེ། བརྩོན་འགྲུས་ནི་ཚོགས་གཉིས་ཀྱི་རྒྱུ་ཡིན་ལ་ཚོགས་གཉིས་ནི་བྱང་ཆུབ་ཆེན་པོ་འགྲུབ་བྱེད་ཀྱི་རྒྱུ་ཡིན་པས་སོ། །དེ་ནི་དཔེར་ན་སྐྱོད་པར་བྱེད་པའི་བྱེད་ལས་ཅན་གྱི་རླུང་མེད་ན་མར་མེ་དང་ཤིང་ལོ་སོགས་གཡོ་བ་མེད་ཅིང་རྐང་ལག་བརྐྱང་བསྐུམ་སོགས་ཀྱི་གཡོ་ བའང་མེད་པ་བཞིན་དུ་དགེ་ཆོས་སྤྱི་དང་ཁྱད་པར་བྱང་ཆུབ་ཆེན་པོ་སྐྱེད་བྱེད་ཀྱི་རྒྱུར་གྱུར་པའི་བསོད་ནམས་ཀྱི་ཚོགས་དང་དེས་མཚོན་༌་པའི་ཡེ་ཤེས་ཀྱི་ཚོགས་ཏེ་ཚོགས་གཉིས་ཀྱང་བརྩོན་འགྲུས་མེད་ན་མི་འབྱུང་སྟེ་བརྩོན་འགྲུས་ནི་དགེ་བའི་ས་ཆེན་པོ་པ་ཡིན་པའི་ཕྱིར་རོ། །
