༄༅། །པ་ལྟར་རོ། །སངས་རྒྱས་ཀྱི་བདག་ཉིད་ཡིན་པས་སེམས་ཅན་མགུ་བར་བྱ་བ་ནི། འཇིག་རྟེན་གྱི་ཁམས་ཀྱི་འགྲོ་བ་མ་ལུས་པ་འདི་དག་ཀུན་ཀྱང་ཐུགས་རྗེའི་བདག་ཉིད་ཅན་གྱི་སངས་རྒྱས་དེས་སྔོན་སློབ་པ་ལམ་གྱི་གནས་སྐབས་སུ་བདག་ གཞན་མཉམ་པ་དང་བརྗེ་བའི་ཉམས་ལེན་ཟབ་མོ་ལ་སློབ་པའི་སྐབས་དང་ཆོས་དབྱིངས་མཉམ་པ་ཉིད་ཀྱི་དོན་ཇི་ལྟ་བ་བཞིན་དུ་གཟིགས་པའི་དུས་སུ་བདག་ཏུ་མཛད་པ་འདི་ལ་ཐེ་ཚོམ་མེད་ལ། རྒྱུ་མཚན་དེས་ན་ད་ལྟ་སེམས་ཅན་ཕལ་བའི་ངོ་བོར་མཐོང་བ་ འདི་དག་ཉིད་བདག་ཅག་གི་མགོན་སྐྱབས་དམ་པར་གྱུར་པའི་སངས་རྒྱས་དེ་དག་ཉིད་ཡིན་ལ་དེའི་ཕྱིར་གུས་པར་བྱས་ན་སངས་རྒྱས་ཀྱི་ཆོས་འགྲུབ་པས་བདག་ཉིད་ཀྱིས་ཅིའི་ཕྱིར་སངས་རྒྱས་ལ་གུས་པ་བཞིན་དུ་དད་པ་དང་གུས་པ་བསྐྱེད་པར་མི་བྱེད་དེ་དད་ཅིང་ གུས་པར་བྱ་རིགས་སོ། །ཡང་མགོན་པོ་སངས་རྒྱས་དེའི་བདོག་ཉིད་ཁོ་ན་ཡིན་པ་ལ་དེའི་ཚུལ་ལ་རྨོངས་ནས་ཅིའི་ཕྱིར་གུས་པར་མི་བྱེད་ཅེས་བཤད་ཀྱང་རུང་ངོ༌། །འགྲེལ་པ་འགར། གཞན་ཡང་གཡོ་མེད་སོགས་ཀྱིས་སངས་རྒྱས་ཀྱིས་སེམས་ཅན་བདག་ གིར་མཛད་པས་གུས་པར་བྱ་རིགས་པར་བསྟན་ལ་འདིས་སེམས་ཅན་བདག་ཏུ་མཛད་པས་གུས་རིགས་པར་བསྟན་པ་ཡིན་ཞེས་འབྱུང་ངོ༌། །སེམས་ཅན་མགུ་བ་ལེགས་པ་ཐམས་ཅད་ཀྱི་རྒྱུར་བསྟན་པ་ནི། སྔར་བཤད་པ་ལྟར་སེམས་ཅན་གྱིས་རང་ལ་གནོད་ པ་སྣ་ཚོགས་བྱེད་པ་ན་ཐམས་ཅད་བཟང་དགུ་ཞིག་ཏུ་བལྟས་ནས་དང་དུ་ལེན་པ་དང་དད་པ་དང་གུས་པ་བསྐྱེད་དེ་སེམས་ཅན་གྱི་སེམས་མགུ་བ་སྐྱེད་པའི་ཐབས་འབའ་ཞིག་བྱེད་པ་འདི་ཉིད་ནི་དེ་བཞིན་གཤེགས་པ་རྣམས་ཐུགས་མཉེས་ཤིང་རངས་པར་བྱེད་པའི་
