བདག་དད་པ་ཐོབ་པའི་རྒྱུ་སྤྱོད་པ་རྣམ་པར་དག་པའམ་ཚུལ་ཁྲིམས་དང་ཐོས་བསམ་ལ་སོགས་པ་རྙེད་པ་ཐོབ་བྱེད་ཀྱི་རྒྱུར་གྱུར་པའི་རང་གི་ཡོན་ཏན་རྣམས་ཅིའི་ཕྱིར་འདོར་བར་བྱེད་དེ་བྱེད་མི་རིགས་སོ། །དེ་ལྟར་རྙེད་བཀུར་འདོད་ན་དེ་འཐོབ་པར་འགྱུར་བའི་རྒྱུ་ཡོན་ ཏན་གྱི་ཆོས་རྣམས་རང་གི་རྒྱུད་ལ་འཛིན་རིགས་པ་ལ་དེ་དག་མི་འཛིན་པར་འདོར་བར་བྱེད་པ་པོ་རང་ཉིད་ལ་རྒྱུ་མཚན་གང་གིས་ཁྲོ་བར་མི་བྱེད་པ་སྒྲོས་ཤིག་སྟེ་རང་ལ་རྙེད་སོགས་མི་འབྱུང་བའི་རྒྱུས་ཁྲོ་བར་རིགས་ཀྱི་གཞན་ལ་རྙེད་སོགས་བྱུང་བའི་རྒྱུས་ཁྲོ་བར་མི་རིགས་སོ་ ཞེས་པའོ། །རང་ལ་རྙེད་བཀུར་མ་བྱུང་ཕྱིན་ཆད་གཞན་ལའང་མེད་ན་དགའ་ཞིང་ལེགས་སོ་ཞེ་ན། ཁྱོད་ནི་རང་གིས་རྙེད་བཀུར་མི་འཐོབ་པའི་རྒྱུ་སྔོན་སྐུ་འཕྲོག་བྱས་པ་དང་གཞན་གྱི་རྙེད་པའི་གེགས་བྱས་པ་དང་གཞན་གྱི་རྙེད་པ་ལ་ཕྲག་དོག་བྱས་པ་སོགས་ལས་ངན་ པའི་སྡིག་པ་བྱས་པ་ལ་༌་ངན་མེད་པར་མ་ཟད་ཀྱི་སླར་ཡང་ཕྲག་དོག་གི་དབང་གིས་རྙེད་བཀུར་ཕུན་སུམ་ཚོགས་པ་འབྱུང་བའི་རྒྱུར་གྱུར་པའི་བསོད་ནམས་ཆེན་པོ་བྱས་ཤིང་བསགས་པའི་གང་ཟག་གཞན་དག་དང་ལྷན་ཅིག་འགྲན་པར་བྱེད་འདོད་དམ་སྟེ་འགྲན་པར་བྱེད་ མི་རིགས་ལ། ཅིས་ཀྱང་འགྲན་ན་བསོད་ནམས་དགེ་བའི་ལས་གསོག་པ་ལ་འགྲན་པར་བྱ་རིགས་སོ། །ཡང་གཞན་ལ་རྙེད་བཀུར་བྱུང་བ་ལ་ཁྲོས་པས་རང་གི་བསོད་ནམས་སོགས་གསུམ་པོ་དོར་ནས་རྙེད་པ་འབྱུང་བའི་རྒྱུ་མི་འཛིན་པ་རང་ལ་ཁྲོ་བར་རིགས་སོ་ཞེས་ ཀྱང་བཤད་དེ་བསོད་ནམས་དང་ནི་དད་པ་སོགས་ལ་འཆད་ཚུལ་མི་འདྲ་བ་འགའ་འདུག་གོ ། དེ་དག་ནི་དགྲ་ལ་བསྟོད་གྲགས་བདེ་སྐྱིད་རྙེད་བཀུར་ལྟ་བུ་བྱུང་བའམ་དེ་དག་སྒྲུབ་པ་སོགས་ཀྱི་སྒོ་ནས་དེ་ལ་ལེགས་པ་བྱེད་པ་ལ་ཡིད་མི་བདེ་བ་དང་མི་བཟོད་པ་སྤངས་ནས་
