༄༅། །ཙམ་ཡང་མི་བཟོད་དོ་སྙམ་ན། ད་ལྟའི་སྐབས་སུ་དགྲ་མི་སྡུག་པས་རང་གི་གཉེན་བཤེས་ལ་བརྡུང་བརྡེག་སོགས་ཀྱི་གནོད་པ་བྱས་པ་དང་གཉེན་བཤེས་སྡུག་པ་དང་བྲལ་བ་ལ་སོགས་པའི་སྡུག་བསྔལ་ཆུང་ངུ་འདི་ཙམ་ལའང་བདག་ གིས་བཟོད་ཅིང་བསྲན་པར་མི་ནུས་པ་མངོན་སུམ་དུ་མྱོང་པས་གྲུབ་ན། རྒྱུ་མཚན་དེ་ལྟ་བས་ན་མ་འོངས་པའི་དམྱལ་བའི་སྡུག་བསྔལ་བཟོད་བླག་མེད་པ་མྱོང་བར་འགྱུར་བའི་རྒྱུ་ཁོང་ཁྲོ་ཤུགས་དྲག་མངོན་གྱུར་དུ་ལྡང་བ་འདི་ཅི་སྟེ་བཟློག་པར་མི་བྱེད་བྱེད་པར་རིགས་ ཏེ་འབྲས་བུ་དམྱལ་བའི་སྡུག་བསྔལ་མི་འདོད་ན་དེའི་རྒྱུ་ཁོང་ཁྲོ་འབད་པས་བཟློག་རིགས་པའི་ཕྱིར་ཏེ་རྒྱུ་མ་བཟློག་ན་འབྲས་བུ་བཟློག་ཐབས་མེད་པས་སོ། །དེ་ཡང་འདི་ལྟར་ད་ལྟ་རང་དང་རང་གི་གཉེན་བཤེས་སོགས་ལ་གནོད་པ་བྱེད་པ་ལ་ཁོང་ཁྲོ་སྐྱེ་བ་ནི་སྡུག་བསྔལ་ མ་བཟོད་པས་ཡིན་ན་དེ་ནི་ཤིན་ཏུ་འགལ་ཏེ་ལྟའི་སྡུག་བསྔལ་ཕྲ་མོ་བག་ཙམ་རེ་མ་བཟོད་ནས་གནོད་བྱེད་ལ་ཁྲོས་པས་ནི་དམྱལ་བའི་སྡུག་བསྔལ་དཔག་ཏུ་མེད་པའི་རྒྱུ་ནན་གྱིས་བསྐྱེད་པས་སོ། །དེས་ན་བདག་ལས་འབྲས་ཀྱི་ཚུལ་ལ་ཤིན་ཏུ་རྨོངས་པའི་སྙམ་ དུ་བསམས་ནས་རང་གིས་རང་ལ་ཁྲེལ་བདས་བྱས་ཏེ་ཁོང་ཁྲོའི་དབང་དུ་མ་ཤོར་བ་ལ་ཅི་ནས་ཀྱང་འབད་པར་བྱ་རིགས་སོ། །དེའང་ད་ལྟ་གནོད་བྱེད་ལ་བརྟེན་ནས་བྱུང་བའི་སྡུག་བསྔལ་མྱོང་དགོས་པ་འདི་ནི་རང་གིས་སྔར་བསགས་པའི་ལས་ངན་གྱི་༌་འབྲས་སུ་ཡིན་ལ། དེ་ལྟ་དེ་མྱོང་བས་ནི་སྔོན་གྱི་ལས་ངན་དུ་མ་ཟད་པར་འགྱུར་ལ། དེ་ལ་སེམས་མི་འཁྲུགས་པར་བཟོད་པར་བྱས་ན་ནི་ཕྱི་མར་དམྱལ་བའི་སྡུག་བསྔལ་གྱི་རྒྱུར་གྱུར་པའི་སྡིག་པ་ཆེན་པོ་གསར་དུ་མི་གསོག་ཅིང་མཐོ་རིས་དང་ཐར་པ་ཐོབ་བྱེད་ཀྱི་བསོད་ནམས་མང་དུ་
