༄༅། །དོན་དུ་གཉེར་ནས་དེ་ལྟ་བུའི་དགོས་པ་གང་གི་དོན་དུ་རྙེད་པ་དང་བཅས་ཏེ་བདག་ཉིད་ཡུན་རིང་པོར་གསོན་པར་འདོད་པ་ཡིན་ན་རྙེད་པའི་དོན་དུ་ཁོང་ཁྲོ་སྐྱེས་པའི་དབང་གིས་ཆེད་དུ་གཉེར་བྱའི་བསོད་ནམས་དགེ་བའི་ལས་དེ་ཉིད་གལ་ཏེ་ཉམས་ཤིང་ ཟད་པར་གྱུར་ན་ཁོང་ཁྲོ་སོགས་ལ་བརྟེན་ནས་སྡིག་པ་མི་དགེ་བ་འབའ་ཞིག་བྱེད་པ་ཡི་སྒོ་ནས་ཡུན་རིང་དུ་འཚོ་ཞིང་གསོན་པ་དེས་ཀོ་ཅི་ཞིག་བྱ་སྟེ་དགོས་པའི་དོན་ཅིང་ཡང་མེད་པས་ན་རྙེད་པའི་བར་ཆད་བྱེད་པ་ལའང་ཁྲོ་བར་མི་བྱའོ། །ཁོང་ཁྲོས་བསོད་ནམས་འཛད་ཅིང་ སྡིག་པ་འཕེལ་ཚུལ་ཤིན་ཏུ་མང་ཡང་མདོ་ཙམ་སྔར་བཤད་པ་ལྟར་ཡིན་ལ། བཟོད་པ་བསྒོམས་པས་སྡིག་པ་འཛད་པ་གོང་དུ་ཏིང་རྒྱལ་གྱི་ལུང་དྲངས་པ་དང་། སྐྱེས་རབས་ལས་ཀྱང་། གང་ཞིག་རང་གི་ཆོས་ཉམས་མི་སེམས་པར། །བདག་གི་སྡིག་སྦྱང་ཕྱིར་ནི་ཞུགས་འདྲ་ ལ། །འདི་ལའང་བདག་ནི་བཟོད་པར་མི་བྱེད་ན། །དེ་ལས་གཞན་པ་དྲིན་མེད་ཅི་འདྲ་ཞིག ། ཅེས་གནོད་བྱེད་ཁོ་རང་གི་ཆོས་ཉམས་པ་ལའང་མི་སེམས་པར་བདག་གི་སྡིག་པ་སྦྱང་བའི་ཕྱིར་དུ་ཞུགས་པ་དེ་འདྲ་བའི་གནོད་བྱེད་དེ་ཉིད་ལ་ཤིན་ཏུ་དྲིན་ཅན་ཡིན་པར་ཤེས་ནས་བཟོད་ པ་སྒོམ་པ་དང་དྲིན་དུ་གཟོ་རིགས་སོ་ཞེས་བསྟན་ཏོ། ཆོས་ལྡན་ཇི་སྲིད་འཚོ་བ་དེ་སྲིད་དུ་དགེ་བ་འཕེལ་བར་གསུངས་པ་ནི་ཁོང་ཁྲོ་སོགས་དང་མ་འདྲེས་པའི་རྣམ་དཀར་འཕེལ་བ་ལ་དགོངས་པའོ། །གཞན་གྱི་དད་པ་ཉམས་པར་བྱེད་དོ་ཞེས་ཁྲོ་མི་རིགས་པ་ནི། གལ་ཏེ་རྙེད་ པའི་བར་ཆད་བྱེད་པ་ཙམ་ལ་ཁྲོ་མི་རིགས་ཀྱང་གཞན་གྱིས་རང་ལ་མི་སྙན་པ་སྨྲ་བ་ནི་སྐྱོན་གྱི་རིགས་གང་ཡོད་སྒྲོགས་ཤིང་ཡོན་ཏན་གྱི་རིགས་གང་ཡོད་བཅབས་ནས་སྨོད་པར་བྱེད་པའི་སྒོ་ནས་བདག་སུན་འབྱིན་པར་བྱེད་པ་ཡིན་པས། དེ་ལ་བརྟེན་ནས་རང་ལ་དད་གུས་ཡོད་
