ཡོད་དེ་བདག་གཅིག་དང་དེ་བྱུང་གི་འབྲེལ་བ་གང་ཡང་མེད་པས་སོ། །དེའང་དོན་གཞན་ཡིན་པས་བདག་གཅིག་ངོ་བོ་གཅིག་པའི་འབྲེལ་བ་མེད་ལ་དེ་གཉིས་རྒྱུ་འབྲས་ཀྱི་ཚུལ་དུ་སྔ་ཕྱི་རིམ་ཅན་དུ་གྲུབ་པ་མ་ཡིན་པས་དེ་ལས་དེ་བྱུང་གི་འབྲེལ་བ་ཡང་མེད་པས་སོ་ཞེས་རྟག་ པ་ཡིན་ན་རྐྱེན་དང་འབྲེལ་མེད་ཡིན་དགོས་ལ། དེའི་ཕྱིར་ལྷན་ཅིག་བྱེད་པའི་རྐྱེན་ཉིད་ཀྱང་མ་གྲུབ་པོ་ཞེས་བསྟན་ཏོ། །དེ་དག་གིས་ནི་གཙོ་བོ་རྟག་པ་དང་བདག་རྟག་པ་སོགས་ལས་སྐྱེ་བ་མིན་གྱི་མི་རྟག་པའི་རྐྱེན་ལས་བྱུང་བ་ཡིན་ནོ་ཞེས་བསྟན་ཏོ། །དངོས་པོ་ཀུན་ སྤྲུལ་པ་ལྟར་ཤེས་ནས་ཁྲོ་མི་རིགས་པ་ནི། གོང་དུ་བཤད་པའི་ཚུལ་དེ་ལྟར་འབྲས་བུ་སྐྱེད་པའི་བྱ་བ་ལ་སོགས་པའི་དངོས་པོ་ཐམས་ཅད་རང་དབང་དུ་གྲུབ་པ་མ་ཡིན་པར་རྒྱུ་རྐྱེན་གཞན་ལ་༌་རག་ལས་ཤིང་ལྟོས་དགོས་པས་གཞན་གྱི་དབང་ལས་བྱུང་བ་ཙམ་ཤ་ སྟག་ཡིན་ལ། རྒྱུ་རྐྱེན་གཞན་དེ་རྣམས་ཀྱང་རང་རང་སྐྱེད་བྱེད་ཀྱི་རྒྱུ་རྐྱེན་སྔ་མ་སྔ་མ་དེ་ཡི་དབང་གིས་འབྱུང་དགོས་པས་ན་རྒྱུ་རྐྱེན་གཞན་དེའང་རང་དབང་མེད་ཅིང་། དེ་ལྟའི་རྒྱུ་རྐྱེན་གྱི་ཐོག་མའི་མཐའ་ཐུག་པ་མེད་པས་ན་རང་དབང་ཅན་གྱི་དངོས་པོ་འགའ་ཡང་མི་སྲིད་ པར་རྒྱུ་རྐྱེན་གཞན་གྱི་དབང་ལས་བྱུང་བའི་རྟེན་འབྲེལ་ཙམ་དང་དེ་ཡང་རང་བཞིན་གྱིས་སྟོང་པ་དང་སྟོང་པ་བཞིན་དུ་ཡང་སྣང་ཞིང་བྱ་བ་བྱེད་པའི་ཚུལ་དེ་ལྟར་ཤེས་ཤིང་ཁོང་དུ་ཆུད་ནས་སྒྱུ་མ་དང་སྤྲུལ་པ་ལྟ་བུའི་དངོས་པོ་ཀུན་ལའང་ཁྲོ་བར་མི་འགྱུར་ཏེ། ཁྲོ་བ་ སྐྱེ་བའི་ཡུལ་ཡུལ་ཅན་ཁྲོ་བ་བཅས་ཐམས་ཅད་རྟེན་འབྲེལ་སྒྱུ་མ་ཙམ་དང་རང་བཞིན་སྟོང་ཉིད་དུ་ངེས་པ་དེའི་ཕྱིར་རོ། །དེ་ལྟར་ཆོས་ཐམས་ཅད་སྣང་ལ་རང་བཞིན་མེད་པ་སྤྲུལ་པ་དང་སྒྱུ་མ་ལྟ་བུར་ཐུགས་སུ་ཆུད་པའི་རྒྱལ་བའི་སྲས་པོ་རྣམས་ནི་ནོར་ལོངས་སྤྱོད་སོགས་
