ཡིན་ལ། གཞན་ཡང་འཆད་ཚུལ་མི་འདྲ་བ་མང་ངོ༌། །རང་དབང་ཅན་གྱི་རྒྱུ་རྐྱེན་ཡོད་པར་འདོད་པ་འགོག་པ་ལ། བདག་དང་གཙོ་བོ་རང་དབང་ཅན་ཐུན་མོང་དུ་དགག་པ་ནི། གྲངས་ཅན་པ་དང་རིག་པ་ཅན་པ་སོགས་ན་རེ། ཁྱེད་ཅག་གིས་རང་དབང་ ཅན་གྱི་ཆོས་ནི་འགའ་ཡང་མེད་དོ་ཞེས་འདོད་པ་ནི་མི་འཐད་དེ། རྟག་གཅིག་རང་དབང་ཅན་གྱི་བདག་དང་གཙོ་བོ་སོགས་ཡོད་ལ་དེ་ལྟ་བུའི་རང་དབང་ཅན་གྱི་རྒྱུ་རྐྱེན་དེ་དག་ལ་བརྟེན་ནས་གནོད་པ་དང་སྡུག་བསྔལ་སོགས་འབྱུང་བ་ཡིན་ནོ་ཞེ་ན། གྲངས་ཅན་པ་ ཁྱོད་ཀྱིས་རྡུལ་མུན་སྙིང་སྟོབས་གསུམ་ཆ་མཉམ་པ་དེ་རྩ་བའི་རང་བཞིན་ཡིན་ཞིང་། དེ་ནི་སྤྱིའམ་གཙོ་བོ་ཡང་ཡིན་ནོ་ཞེས་བཏགས་ནས། དེ་ཉིད་རྟག་པ་གཅིག་པུ་རང་དབང་ཅན་ཡིན་པ་སོགས་ཀྱི་མཚན་ཉིད་ལྔ་ལྡན་ཡིན་ལ། དེས་རྣམ་འགྱུར་སྣ་ཚོགས་པས་ བསྡུས་པའི་གནོད་པ་དང་སྡུག་བསྔལ་སོགས་རང་དབང་ཉིད་དུ་སྐྱེད་པར་བྱེད་དོ་ཞེས་བྱ་བར་གང་འདོད་པ་དེ་དང་། ཤེས་རིག་གི་སྐྱེས་བུ་ལ་བདག་གམ་གང་ཟག་ཅེས་བརྗོད་ནས་དེ་ཉིད་ཟ་བོ་རྟག་དངོས་སོགས་ཀྱི་མཚན་ཉིད་དང་ལྡན་པ་དང་དེས་གཙོ་བོས་ བསྐྱེད་པའི་རྣམ་འགྱུར་སྒྲ་དང་གཟུགས་སོགས་ཀྱི་ཡུལ་ལ་རང་དབང་ཉིད་དུ་ལོངས་སྤྱོད་པར་བྱེད་དོ་ཞེས་རྟོག་པས་སྒྲོ་བཏགས་ནས་བཏགས་པ་གང་ཡིན་པ་དེ་དག་ནི་ཁྱོད་རང་གིས་གྲུབ་མཐས་བཏགས་པ་ཙམ་དུ་ཟད་ཀྱི་ཚད་མས་གྲུབ་པ་ནི་མེད་དེ། གཙོ་བོ་དང་ བདག་དེ་དག་ཉིད་ནི་རང་རང་མ་སྐྱེས་པའི་སྔ་རོལ་དུ་སྤྱིའམ་གཙོ་བོས་ནི་གནོད་པ་དང་སྡུག་བསྔལ་ལ་སོགས་པའི་རྣམ་འགྱུར་རྣམས་རང་དབང་དུ་སྐྱེད་པའི་ཆེད་དང་། བདག་གམ་གང་ཟག་གིས་ནི་དེ་ལྟ་བུའི་གཙོ་བོས་བསྐྱེད་པའི་རྣམ་འགྱུར་རྣམས་ལ་
