མ་ནི་ལྷ་མོ་ཙཎྜི་ཀ་སྟེ་དེའི་བུ་ལ་ལྷར་འཛིན་པ་དག་གིས་སྟོན་ཟླ་འབྲིང་པོའི་ཚེས་དགུའི་དུས་ལ་སོགས་པར་ཞག་གསུམ་མམ་ཞག་གཅིག་སྨྱུང་གནས་བྱས་ནས་རང་གི་ལུས་སྦྱིན་སྲེག་གི་མེར་བསྲེག་པ་དང་ཡན་ལག་གཅོད་པ་དང་འབིགས་པར་བྱེད་པའི་ སྡུག་བསྔལ་གྱི་ཚོར་བ་བཟོད་པར་བྱེད་ལ། །ལྷོ་ཕྱོགས་ཀྱི་ཡུལ་ཀཎ་ཌ་པ་དག་རང་གི་མིང་ཡིག་གཞན་གྱི་ཐོག་མར་བྲི་བའི་ཆེད་དུ་ང་རྒྱལ་གྱིས་ཕན་ཚུན་འགྲན་ནས་ལུས་བསྲེགས་པ་དང་བཅད་པས་སྡུག་བསྔལ་མྱོང་བར་བྱེད་ཅིང་སྲོག་ཀྱང་འདོར་བར་བྱེད་ཅེས་ པ་ནི་གཙོ་བོར་འགྲེལ་ཆེན་ལྟར་ཡིན་ལ། ཡང་དབང་ཕྱུག་གི་དཀའ་ཐུབ་བཟློག་ཅིང་ཉམས་པར་བྱེད་པའི་ལྷ་མོ་ཨུ་མ་ལ་དད་པ་དག་གིས་དེ་མཆོད་ཕྱིར་སྟོན་འབྲིང་གི་ཚེས་དགུའི་དུས་སོགས་ཞག་གཅིག་གམ་གསུམ་དུ་ཟས་བཅད་ནས་རང་གི་ལུས་བསྲེགས་ པ་དང་བཅད་པ་སོགས་བྱེད་པ་དང་། ཡུལ་ཀཎ་ཌ་པ་དག་ཕན་ཚུན་འགྲན་པའི་ཆེད་ལུས་བསྲེགས་པ་དང་བཅད་པ་སོགས་བྱེད་ཅེས་དང་། ཀཎ་ཌ་པ་ན་གནས་པའི་ཕྱི་རོལ་པ་ཁ་ཅིག་ཚངས་པ་ཐོབ་པར་འདོད་པས་ཉི་ཟླ་གཟས་ཟིན་ཚེ་རང་གི་མགོ་གཅོད་པ་ སོགས་བྱེད་ཅེས་འགྲེལ་པ་རྣམས་ལས་འཆད་ཚུལ་ཅུང་ཟད་མི་འདྲ་བ་བྱུང་ལ། གཞན་ཡང་ལོག་པའི་བཤེས་གཉེན་གྱིས་བསླུས་པ་དག་ལམ་ངན་པ་མེ་ལྔ་བསྟེན་ཅིང་བསྲེགས་པ་དང་མདུང་རྩེ་གསུམ་ལ་མཆོངས་ཏེ་གཅོད་པ་སོགས་ཀྱི་སྒོ་ནས་རང་ལ་སྡུག་ བསྔལ་གྱི་ཚོར་བ་དྲག་པོ་བྱེད་པ་ནི་དགོས་པའི་དོན་ཅི་ཡང་མེད་བཞིན་དུ་ཡང་བཟོད་པར་བྱེད་ན་དོན་ཆེན་པོ་གཞན་སེམས་ཅན་ཐམས་ཅད་ཀྱི་དོན་དུ་ཐར་པ་ཡི་མཆོག་ཤིན་ཏུ་དཀོན་པའི་སངས་རྒྱས་ཉིད་ཀྱི་གོ་འཕང་བླ་མེད་སྒྲུབ་པའི་དོན་དུ་རྒྱལ་སྲས་རྣམས་ཀྱི་སྤྱོད་པ་
