༄༅། །ལ་དེར་མ་ཞུགས་ན་མི་འབྱུང་བའང་ཡོད་དོ། །དེ་ལ་སྔ་མ་གཉིས་ནི་གང་ལྟར་ཡང་ངེས་པར་འབྱུང་བས་རེ་ཞིག་བཟློག་མི་ནུས་པས་དེ་དག་ནི་དང་དུ་ལེན་དགོས་ཏེ། དང་ལེན་མེད་ན་སྡུག་བསྔལ་གཞིར་གནས་དེ་རང་གི་སྟེང་དུ་ཡིད་མི་ བདེའི་རྣམ་རྟོག་གིས་བསྐྱེད་པའི་སེམས་ཁྲལ་གྱི་སྡུག་བསྔལ་བསྣན་ནས་ཤིན་ཏུ་བཟོད་དཀའ་བར་འགྱུར་ལ། སྡུག་བསྔལ་དང་ལེན་ཡོད་ན་སྡུག་བསྔལ་གཞི་གཞག་དེ་མ་ལོག་ཀྱང་ཡིད་མི་བདེས་བསྐྱེད་པའི་སེམས་ཁྲལ་གྱི་སྡུག་བསྔལ་དེ་གཏན་མེད་སྡུག་བསྔལ་ ཁོ་རང་དང་སྡུག་བསྔལ་གཞན་ཡང་ལམ་དུ་འཁྱེར་ཐབས་བྱས་པས་སྡུག་བསྔལ་ཇེ་ཆུང་དུ་སོང་ནས་བཟོད་མི་དཀའ་བར་འགྱུར་བ་དང་། ཆོས་ཕྱིར་དཀའ་སྤྱད་ལྟ་བུའི་སྡུག་བསྔལ་བ་ལའང་སྔར་བཤད་ལྟར་འཇིག་རྟེན་ན་དོན་མེད་པའི་སྡུག་བསྔལ་སོགས་ ལའང་བཟོད་པར་བྱེད་ན་རང་གཞན་གྱི་དོན་ཆེན་པོ་འགྲུབ་བྱེད་ཀྱི་སྡུག་བསྔལ་ཅིའི་ཕྱིར་མི་བཟོད་སྙམ་པའི་སྒོ་ནས་ལམ་དུ་འཁྱེར་ཤེས་པ་ཞིག་མེད་དུ་མི་རུང་བ་ཡིན་པས་གསུངས་སོ། །དེས་ན་སྡུག་བསྔལ་དང་ལེན་གྱི་བཟོད་པ་སྐྱེད་པ་འདི་གནད་ཤིན་ཏུ་ཆེ་ ཞིང་ཉམས་ལེན་གྱི་འགག་སྡོམ་ཆེན་པོ་ཡིན་པའི་ཚུལ་ཤེས་པར་བྱའོ། །དོན་ཆེན་པོ་སྒྲུབ་ཕྱིར་བཟོད་རིགས་པ་དཔེས་བསྟན་པ་ནི། ལྷ་དབང་ཕྱུག་ཆེན་པོ་དཀའ་ཐུབ་ལ་གནས་པ་ན་ལྷ་རྣམས་ཀྱིས་ལྷ་མོ་ཨུ་མར་སྤྲུལ་ནས་དཀའ་ཐུབ་ལས་བཟློག་པས་དཀའ་ བཟློག་སྟེ་དེ་དད་པ་དང་། ཡུལ་ཀཎ་ཌ་པ་དག་ཟླ་བ་གཟས་པའི་དུས་བསོད་ནམས་འདོད་པས་མེར་བསྲེགས་པ་དང་མཚོན་གྱིས་གཅོད་པ་སོགས་བྱེད་དོ་ཞེས་རྔོག་ལོ་གསུངས་པར་བཤད་ལ། རྒྱ་དཔེར་རྫོང་མོའི་བུ་པ་ཞེས་འབྱུང་ཞིང་དེ་ལ་རྫོང་གཏུམ་
