༄༅། །བའི་སོར་མོ་དག་ནི་ཀུན་གྱིས་ཀྱང་བརྡ་བྱ་ལ་གཞན་གྱིས་འགྲོ་བའི་ལམ་སོགས་གང་ཡིན་རང་ལ་འདྲི་བའི་ཚེ་ལམ་ཡང་དེ་ལྟར་བསྟན་པར་བྱའོ། །ཡང་གི་སྒྲས་མ་གུས་པ་དང་ལག་གཡོན་གྱིས་དངོས་པོ་གཞན་ལྟ་ཅི་ལམ་ཡང་ བསྟན་པར་མི་བྱ་ཞེས་སྟོན་པ་ཡིན་གསུངས་པ་འདུག་མོད། འོན་ཀྱང་དངོས་པོ་གཞན་སྟོན་པ་ལ་ལག་གཡས་བརྐྱང་བ་དེ་ལྟ་བུས་སྟོན་པར་མ་ཟད་ལམ་ཡང་དེ་ལྟར་བསྟན་པར་བྱ་ཞེས་བཤད་ན་བདེ་སྙམ། དོན་ཆུང་དུ་དང་ཐག་ཉེ་བ་ལ་བརྡ་བྱ་དགོས་པའི་ཚེ་ ལག་པ་ཤས་ཆེར་དྲག་ཏུ་བསྐྱོད་ཅིང་བརྐྱང་ནས་བརྡ་བྱ་བ་མིན་ཏེ་རྒོད་བག་གི་ཉེས་པར་འགྱུར་བས་སོ། །དེས་ན་ལག་གཡས་ཅུང་ཟད་བསྐྱོད་ལ་སྒྲ་དྲག་ཞན་འཚམས་པར་བསྒྲགས་པ་དང་དེའང་སེ་གོལ་གཏོག་པའི་སྒྲ་བྱ་བ་ཙམ་དང་སྐད་ཆེ་ཆུང་འཚམ་པས་ འབོད་པ་ལ་སོགས་པའི་སྒོ་ནས་དལ་བུས་བརྡ་གང་དགོས་རྣམས་བྱ་སྟེ། དེ་ལས་གཞན་དུ་ལག་པ་ཅུང་ཟད་བསྐྱོད་པ་དང་སྒྲ་ཆུང་དུ་ཙམ་བྱས་པས་ཆོག་པ་ལག་པ་ཤས་ཆེར་བསྐྱོད་པ་དང་སྒྲ་དྲག་པོ་བསྒྲགས་པ་སོགས་བྱེད་ན་སེམས་མཉམ་པར་མ་བཞག་ ཅིང་ལུས་ངག་གི་སྤྱོད་ལམ་མ་བསྡམས་པའི་ཉེས་པར་འགྱུར་རོ། །ཐག་རིང་བ་དང་མྱུར་དུ་བརྡ་སྤྲོད་སོགས་ཀྱི་དགོས་པ་ཡོད་ཚེ་དྲན་ཤེས་ཀྱིས་ཟིན་པས་ལག་པ་ཤས་ཆེར་བསྐྱོད་དེ་སྒྲ་ཆེན་པོ་བསྒྲགས་པའམ་སྐད་གསང་མཐོན་པོས་འབོད་པ་ལ་ཉེས་པ་ མེད་དོ། །དེ་ལྟར་གཞན་མ་དད་པར་འགྱུར་བའི་སྤྱོད་པ་ཕྲ་མོ་རྣམས་ཀྱང་ལེགས་པར་བརྟགས་ནས་མ་སྤངས་ན་གཞན་མ་༌་དད་པ་སྐྱེས་ནས་སྡིག་ཆེན་པོ་གསོག་པ་དང་གཞན་དོན་མི་འགྲུབ་པ་སོགས་ཀྱི་རྐྱེན་དུ་འགྱུར་བས་དེ་སྤོང་བ་གལ་ཆེའོ། །དེའི་
