སྟེ། །རྒྱུགས་ཕྱིར་མ་ལགས་སྙེམས་པའི་ཕྱིར་མ་ལགས། །མཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་ཆགས་སྡང་དང་རྒྱུགས་པ་སོགས་ཀྱི་ཕྱིར་མ་ཡིན་པར་ལུས་འཚོ་ཞིང་གནས་པའི་ཕྱིར་བཟའ་སྙམ་པ་དགོས་ལ། དེའང་རྒྱགས་པ་ནི་ འདོད་ཆགས་ཀྱི་རྒྱུ་ལས་སེམས་འགྱུར་བའི་ཁྱད་པར་དང་། སྙེམས་པ་ནི་ང་རྒྱལ་དང་། མཚག་ནི་ཉམས་མཚག་བཟང་བའམ་ཉམས་སྟོབས་རྒྱུས་པ་ཡིན་ལ། སྔ་མ་གཉིས་ཀྱི་ཕྱིར་ཟ་བ་ནི་འདོད་ཆགས་ཀྱིས་ཟ་བ་དང་། ཕྱི་མའི་ཕྱིར་ཟ་བ་ནི་ཞེ་སྡང་གིས་ ཟ་བ་ཟིན་པར་གསུངས་སོ། །གཞན་ཡང་དཔུང་བཟང་ལས། དཔེར་ན་རྨ་ནི་གསོ་དང་བསལ་བའི་ཕྱིར། །ནད་པ་དག་ལ་སྨན་ནི་སྤྲིན་པ་ལྟར། །དེ་བཞིན་འདིར་ཡང་བཀྲེས་པའི་སྡུག་བསྔལ་དག །བསལ་ཕྱིར་རྒྱལ་བས་ཁ་ཟས་བཟའ་བར་གསུངས། ། ལ་ལ་ལམ་གྱིས་དུབ་ཅིང་འགྲོ་བའི་ཚེ། །བཀྲེས་སྐོམ་གདུངས་པས་རང་གི་བུ་ཡི་ཤ། །ཟ་བ་བཞིན་དུ་རྣལ་འབྱོར་སེམས་དམན་ཞིང་། །འཚེ་དང་རྒྱགས་ཕྱིར་བཟའ་བར་མི་བྱའོ། །མང་དུ་བླུགས་ན་རྩོལ་མེད་མཐོ་བ་དང་། །དེ་བཞིན་ཉུང་དུས་སྲང་ནི་ དམའ་འགྱུར་ལ། །རན་པས་སྐད་ཅིག་མཉམ་པར་འགྲོ་བ་ལྟར། །ལུས་ཅན་ཁ་ཟས་བཟའ་བའང་དེ་བཞིན་ནོ། །དཔེར་ན་ཁང་རྙིང་མི་ཞིག་བྱ་བའི་ཕྱིར། །མི་ཡིས་ཀ་བ་བརྟན་པོ་གཟུགས་པ་ལྟར། །དེ་བཞིན་ལུས་ཀྱི་འཁྲུལ་འཁོར་གནས་པ་དང་། ། ཤིང་རྟའི་མིག་སྐུད་བཞིན་དུ་ཁ་ཟས་བཟའ། །འདོད་པའི་ཁམས་ནི་ཁ་ཟས་ཀྱིས་གནས་ཤེས། །རྒྱལ་བས་ཆོས་གཅིག་ཏུ་ནི་བཀའ་སྩལ་ཏོ། །ལུས་ནི་ཆུ་ཤིང་བཞིན་དུ་རིག་བྱ་སྟེ། །སེམས་ནི་བཟའ་བཏུང་ཚོགས་ལ་ཆགས་མི་བྱ། །ཞེས་གསུངས་
