ཟས་དེ་ལུད་སོགས་མི་གཙང་བ་ལས་འབྱུང་བར་བསམ་པ་འབྱུང་བའི་འདུ་ཤེས་དང་། འབྲས་ཆན་ལ་གྲོག་མའི་ཕྲུ་གུ་ལྟ་བུའི་སྲིན་བུ་དང་ཞོ་ལ་མིའི་ཀླད་པ་དང་ཕྱེ་ལ་མི་རུས་ཀྱི་ཕྱེ་དང་ཤ་ལ་བུའི་ཤ་དང་འདྲ་བ་སོགས་འདྲ་བའི་འདུ་ཤེས་དང༌། ཟོས་པ་ལས་སྙིགས་མ་བད་ སྣབས་སོགས་སུ་འགྱུར་བར་བསམ་པ་འགྱུར་བའི་འདུ་ཤེས་དང་། ཟས་ཀྱི་དོན་དུ་ཕ་དང་བུ་མོ་སོགས་ཀྱང་འཐབ་རྩོད་འོང་བས་ཕྱིར་རྒོལ་བའི་འདུ་ཤེས་དང་། ཟས་ཟོས་པ་ལས་མི་གཙང་བའི་བདག་ཉིད་གཤང་གཅི་སོགས་ཤིན་ཏུ་སྨད་པ་འབྱུང་བས་རྒྱུ་ མཐུན་པའི་འདུ་ཤེས་དང་། ཟས་ཟོས་པས་ཆགས་སོགས་ཉོན་མོངས་འདྲེན་པས་རྟེན་ཅིང་འབྲེལ་བར་འབྱུང་བའི་འདུ་ཤེས་དང་། ཚེགས་ཆེན་པོས་ཟས་ཚོལ་དགོས་པས་བཙལ་དཀའ་བའི་འདུ་ཤེས་དང་། གཡོ་སྐོལ་སོགས་གྲོགས་གཞན་ལ་ལྟོས་དགོས་ པས་རག་ལས་པའི་འདུ་ཤེས་དང༌། མ་ཞུ་བ་དང་ལོག་པར་ཞུ་བས་ནད་སྣ་ཚོགས་སྐྱེད་པས་ནད་དང་བཅས་པའི་འདུ་ཤེས་དང་། ཟོས་པ་ལས་ཆ་གཅིག་ལུས་ཀྱི་མེས་བསྲེགས་ཆ་གཅིག་གིས་ལུས་བརྟས་ཆ་གཅིག་སྲིན་བུར་འགྱུར་ཆ་གཅིག་གཤང་གཅི་སོགས་སུ་ འགྱུར་བས་སོ་སོར་འགྲོ་བའི་འདུ་ཤེས་ཏེ་བཅུའོ། །གཞན་ཡང་ཟས་ལ་སྲེད་པའི་གཉེན་པོར་དེའི་ཉེས་དམིགས་བསམ་པ་ལ་གསུམ་ལས། དང་པོ་ལོངས་སྤྱོད་པའི་རྒྱུ་ལས་བྱུང་བའི་ཉེས་དམིགས་ནི། ཟས་ཁ་དོག་དྲི་རོ་བཟང་པོ་ཅི་འདྲ་བའང་སོས་བལྡད་མཆིལ་ མས་བརླན་པར་བྱས་པ་ན་སྐྱུགས་པ་ལྟར་འགྲོ་བར་སེམས་པའོ། །གཉིས་པ་ཟས་ཞུ་བ་ལས་བྱུང་བའི་ཉེས་དམིགས་ནི། ནམ་གྱི་ཐུན་བར་པའམ་ཐ་མ་ལ་ཟས་དེ་ཞུ་ནས་ཤ་ཁྲག་སོགས་སྐྱེ་ཞིང་ཁ་ཅིག་ནི་གཤང་གཅིར་འགྱུར་ཞིང་། དེ་ཉིན་རེ་བཞིན་བསལ་
