༄༅། །སྔོན་དུ་ལེགས་པར་འོངས་སམ་ཞེས་བརྗོད་པ་ལ་སོགས་པའི་གསོང་བོར་སྨྲ་བའམ་རྒྱུན་པར་ཡིད་ཕེབས་པར་སྨྲ་བའི་གཏམ་གསོང་བོ་སྟེ་དྲང་ཞིང་བདེན་པའི་ཚིག་སྨྲ་བར་གྱིས་ཤིག་ཅེས་ངག་གི་ཀུན་སྤྱོད་དང་། ཁྲི་དང་ཁྲིའུ་ཆུང་དང་མལ་སྟན་ ལ་སོགས་པའི་ཡོ་བྱད་བཤམས་པ་དང་སྡུད་པ་སོགས་བྱེད་པའི་སྐབས་སུ་ཡང་མ་བརྟགས་པར་བབ་ཅོལ་དུ་རྟབ་རྟབ་པོར་ཤུགས་ཆེན་པོས་སྒྲ་དྲག་པོ་དང་བཅས་པར་གར་བབས་བབས་སུ་མི་དོར་རོ་ཞེས་ཏེ་གཞན་ལ་གནོད་པའི་རྒྱུ་སྤང་བ་དང་། ཁང་པའི་སྒོ་འབྱེད་པའི་ཚེ་ ཡང་བཙན་ཐབས་ཀྱིས་དྲག་ཏུ་ཕུལ་ཏེ་མི་དབྱེ་སྟེ་ནང་ན་གནས་པ་ལ་མི་དགའ་བ་སྐྱེད་པས་སོ། །མདོར་ན་དུས་རྟག་ཏུ་སྤྱོད་ལམ་ཐམས་ཅད་ཀྱི་སྐབས་སུ་ཡང་དྲག་རྡལ་དང་ཁེངས་དྲེགས་ཀྱི་སྤྱོད་པ་རྩུབ་མོ་མི་བྱ་བར་འུར་སྒྲ་དང་གཅོམ་བསྐྱུང་སྟེ་སྤྱོད་ལམ་ཀུན་ནས་ཞི་ཞིང་ འཇམ་པའི་སྒོ་ནས་གཞན་དགའ་ཞིང་མོས་འདུན་སྐྱེ་བར་འགྱུར་བ་དེ་ལྟ་བུ་བྱའོ་སྟེ་གཞན་མི་དགའ་བ་སྤོང་བ་དང་གཞན་བསམ་གཏན་སྒོམ་པའི་ཚེར་མ་སྤོང་བའི་ཐབས་སོ། །སྤྱོད་ལམ་འཇམ་པོ་བྱ་ཚུལ་དཔེས་བསྟན་པ་ནི། དཔེར་ན། ཆུ་སྐྱུར་ཏེ་ཉ་གསོད་པའི་བྱ་དང་བྱི་ལ་ དང་ཆོམ་རྐུན་བྱེད་པ་དག་གཅོམ་བསྐྱུང་ནས་འུར་སྒྲ་ཆེན་པོ་བྱེད་པ་མེད་པར་གཞན་གྱིས་མི་ཚོར་བོར་བྱས་ནས་དལ་བུས་འཇབ་ཅིང་འགྲོ་བ་ཡིས་རང་རང་གིས་མངོན་པར་འདོད་པའི་དོན་སོ་སོར་སྒྲུབ་ནུས་པ་ཡིན་གྱི་དེ་ལྟར་མ་བྱས་ན་སྒྲུབ་མི་ནུས་ལ། ཐུབ་པས་སྟེ་སྒོ་གསུམ་ འདུལ་སྦྱོང་བྱེད་པའི་དཀའ་ཐུབ་ཀྱི་བརྟུལ་ཞུགས་ཉེ་བར་བླངས་པའི་བྱང་སེམས་རྣམས་ཀྱིས་ཀྱང་རྟག་ཏུ་དེ་བཞིན་དུ་བག་ཡོད་པའི་སྒོ་ནས་སྤྱོད་ལམ་ཞི་ཞིང་དུལ་བ་ལ་སྤྱད་པར་བྱས་ནས་རང་གིས་མངོན་པར་འདོད་པ་ལྟར་གྱི་གཞན་གྱི་དོན་སྒྲུབ་པའི་ཐབས་ལ་མཁས་
