འདུས་ཤིང་སྤུངས་པའི་ཕུང་བོ་འདི་ལ་ཕྱི་ནང་མགོ་མཇུག་གང་དུ་ཡང་བསྔགས་པར་འོས་ཤིང་སྲེལ་བར་འོས་པའི་སྙིང་པོ་ཅི་འདྲ་བ་ཞིག་ཡོད་ཅེས་བདག་ཉིད་ཀྱིས་ནི་སོ་སོར་རྟོག་པའི་ཤེས་རབ་ཀྱིས་ཡང་དང་ཡང་དུ་བརྟག་པར་གྱིས་ཤིག་དང་ཡིད་བརྟན་རུང་ཞིང་དཔྱད་ བཟོད་པའི་སྙིང་པོ་ཅི་ཡང་མེད་དོ། །དེ་ལྟར་རྩོལ་བ་ཆེན་པོས་འབད་དེ་ཕྱི་ནང་ཀུན་ཏུ་ཞིབ་ཏུ་ང་ཙལ་ཀྱང་བཙལ་ཡུལ་གྱི་ལུས་དེར་ཚོལ་མཁན་གྱི་ཡིད་ཁྱོད་ཀྱིས་བཙལ་བྱའི་སྙིང་པོ་ཅུང་ཟད་ཙམ་ཡང་མ་མཐོང་ན་སྔར་རྨོངས་པས་སྙིང་པོ་ཡོད་པར་རློམ་ནས་སྲུང་བར་མ་ཟད་ ད་ལྟ་སྙིང་པོ་མེད་པར་ངེས་ཤིང་གོ་བཞིན་དུ་ཡང་ད་དུང་རྒྱུ་མཚན་ཅིའི་ཕྱིར་ཆགས་ཤིང་ཞེན་པའི་ཚུལ་གྱིས་ཡིད་ཁྱོད་ནི་ལུས་འདི་སྔར་བཞིན་སྲུང་བར་བྱེད་དེ་བྱེད་པའི་རྒྱུ་མཚན་གང་ཡིན་པ་དེ་སྨོས་ཤིག་ཅེས་པ་སྟེ་རྒྱུ་མཚན་སྨྲ་རྒྱུ་མེད་པས་སོ། །ལུས་ལ་ཉེར་མཁོ་མེད་ པས་སྲུང་མི་རིགས་པ་ནི། སྙིང་པོ་མེད་ཀྱང་ལོངས་སྤྱད་དུ་རུང་ངོ་སྙམ་ན། ལུས་འདི་མི་གཙང་བ་དུ་མ་འདུས་ཤིང་བསགས་པ་ཡིན་ལ་ཡིད་ཁྱོད་ཀྱིས་ལུས་ཀྱི་ཤ་སོགས་མི་གཙང་བའི་ཚོགས་རྣམས་ནི་བཟར་མི་རུང་ཞིང་ལུས་ཀྱི་ཁྲག་དག་ཀྱང་བཏུང་དུ་མི་རུང་ལ་ ནང་ཁྲོལ་རྒྱུ་མ་དང་ལྟོ་བ་ལ་སོགས་པའང་གཞིབ་པའམ་འཇིབ་ཏུ་མི་རུང་བ་ཡིན་ན་ཅི་ཡང་མི་རུང་བའི་ལུས་འདི་ཉིད་ཀྱིས་ཡིད་ཁྱོད་ལ་ཅི་ཞིག་བྱ་སྟེ་ལོངས་སྤྱད་དུ་རུང་བའི་ཉེར་མཁོ་ཅུང་ཟད་ཀྱང་མེད་པས་སོ། །དགོས་པ་གཞན་ཅི་ཡང་མེད་པའི་ལུས་འདི་གལ་ཏེ་སྲུང་ ན་ཉིས་ན་སྟེ་རྣམ་པ་གཅིག་ཏུ་ནའམ་རྒྱུ་མཚན་གཅིག་ཏུ་ན་ཝ་དང་བྱ་རྒོད་དང་། རྒྱ་དཔེ་སོགས་སྒྲ་ཡོད་པར་གསུངས་པས་དུར་བྱ་དང་ཁ་ལ་སོགས་པ་དུར་ཁྲོད་ཀྱི་མི་ཤ་ཟ་བ་རྣམས་ཀྱིས་བཟའ་བྱའི་ཟས་ཀྱི་དོན་དུ་ལུས་འདི་སྲུང་བ་ཡིན་ན་དེ་ཙམ་གྱི་དོན་དུ་སྲུང་བ་ལ་མི་
