༄༅། །རང་གནས་པའི་རྟེན་དུ་གཟུང་བར་མི་བྱེད་དེ་བྱེད་རིགས་ཀྱི་མི་གཙང་བ་དུ་མ་ཕྱོགས་གཅིག་ཏུ་འདུས་ཤིང་ཚོགས་པའི་ལུས་ཀྱི་འཁྲུལ་འཁོར་འདི་ཉིད་ནི་སུམས་ཤིང་རུལ་བ་དྲི་ང་བའི་རང་བཞིན་ཅན་དུ་འདུག་ཅིང་དཀའ་ཚེགས་ཀྱིས་ཀྱང་སྐྱོང་དགོས་ པ་འདི་གཅེས་སྤྲས་ཀྱིས་བསྲུངས་ཏེ་བསྲེལ་བར་བྱས་པས་ཅི་ཞིག་རུང་སྟེ་འདིས་ནི་གནས་པའི་རྟེན་སོགས་ཉེར་མཁོའི་ཡོ་བྱད་ཀྱི་རྣམ་གྲངས་ཅིར་ཡང་མི་རུང་ངོ་། །ཅིའི་ཕྱིར་སྲུང་ཞེས་དང་བསྲུངས་ཏེ་ཅི་ཞིག་རུང་ཞེས་པ་དག་ཀྱང་དོན་མེད་པར་ཆགས་ཞེན་ཙམ་གྱིས་སྲུང་མི་ རིགས་ཞེས་བསྟན་པ་ཡིན་གྱི། དེ་ལས་གཞན་དུ་སྙིང་པོ་ལེན་པ་དང་གཞན་དོན་སྒྲུབ་པ་སོགས་ཀྱི་ཕྱིར་དུ་ནི་ལུས་བསྲུང་དགོས་པ་སྲུང་ཐབས་བསྲུངས་པའི་དགོས་པ་སོགས་མང་པོ་བསླབ་བཏུས་ལས་གསུངས་སོ། །ལུས་ལ་སྙིང་པོ་མེད་ལ་དེ་མེད་པས་སྲུང་མི་རིགས་པ་ནི། མི་གཙང་ཡང་འདི་ལ་སྙིང་པོ་ཡོད་པས་སྲུང་ངོ་སྙམ་ན། ལུས་འདི་ལ་ཆ་དང་ཆ་སོ་སོར་ཕྱེ་ནས་འདི་ནི་པགས་པའོ་འདི་ནི་ཤའོ་འདི་ནི་རུས་པའོ་ཞེས་སོགས་སོ་སོར་བརྟགས་ན་སྙིང་པོ་མེད་དེ། འདི་ལྟར་ཐོག་མར་ལུས་ཀྱི་པགས་པའི་རིམ་པ་འདི་རང་གི་བློ་ཤེས་རབ་ཀྱི་ མཚོན་རྣོན་པོ་ཡིས་ཤ་རུས་སོགས་ལུས་ཀྱི་ཆ་གཞན་ལས་ཐ་དད་དུ་རྣམ་པར་ཕྱེ་ནས་བརྟགས་ན་སྙིང་པོ་མེད་ལ། པགས་པའི་འོག་གི་ཤ་ཡི་ཕུང་བོ་ཡང་རུས་པའི་དྲ་བ་རྣམས་ལས་ཤེས་རབ་ཀྱི་མཚོན་གྱིས་གུད་དུའམ་ལོགས་སུ་ཕྱེ་ནས་བརྟགས་ན་སྙིང་པོ་མེད་ལ། རུས་པའི་འཁྲུལ་འཁོར་རྣམས་ཀྱང་ལྟ་ཚིགས་དང་རྩིབས་རུས་ལ་སོགས་པའི་ཆ་དང་ཆར་སོ་སོར་དབྱེ་བར་བྱས་ནས་རུས་པའི་ནང་གི་བཅུད་རྐང་མར་ལ་ཐུག་གི་བར་དུ་སྙིང་པོ་ཡོད་མེད་ལེགས་པར་བལྟ་བར་བྱ་ཞིང་ས་ཆུ་སོགས་འབྱུང་བའི་ཚོགས་དང་ཕ་མའི་མི་གཙང་བ་
