བསྟན་ལ། མདོར་ན་སེམས་ཅན་གཞན་གྱིས་བདག་མ་རུངས་པར་མི་འགྱུར་ཞིང་བདག་གིས་ཀྱང་གཞན་མ་རུངས་པར་མི་འགྱུར་བའི་ཐབས་སུ་གཉེན་པོའི་ཡོན་ཏན་དེ་དག་ལྡན་དགོས་པར་བསྟན་པ་ཡིན་ནོ། །དལ་འབྱོར་རྙེད་དཀའ་བསམ་ནས་སེམས་དབང་དུ་བྱ་བ་ནི་མི་ ཁོམ་པའི་གནས་སུ་འཁྱམས་འཁྱམས་ཏེ་དུས་ཡུན་རིང་མོ་ཞིག་ལོན་ནས་གཟོད་ཚུལ་ཁྲིམས་སོགས་དགེ་རྩའི་སྟོབས་ལས་གནས་རིས་ངན་པ་དེ་དག་ཏུ་མ་སྐྱེས་པར་འདིར་རྙེད་དཀའ་བའི་དལ་བའི་མཆོག་ཐོབ་པ་ནི་ངོ་མཚར་ཆེ་བའི་ང་རིས་ཙམ་མོ་སྙམ་དུ་དལ་འབྱོར་ རྙེད་དཀའ་བའི་ཚུལ་ཡང་དང་ཡང་དུ་སེམས་པ་དང་། ད་ནི་འདི་ཉིད་ལ་སྙིང་པོ་བླངས་ནས་དོན་ཆེན་པོ་ཡོད་པ་ཉིད་དུ་བྱའོ་བསམ་ནས་གོང་དུ་སེམས་དགེ་བའི་དམིགས་རྣམས་ལ་འདོགས་པའི་ཐབས་མང་པོ་བཤད་པ་དེ་ལྟ་བུར་སེམས་པའི་སྒོ་ནས། དཔེར་ན། རིའི་རྒྱལ་པོ་རི་ རབ་རྐྱེན་གང་གིས་ཀྱང་མི་གཡོ་བར་བརྟན་པར་གནས་པ་ལྟར་སྤང་བྱ་མི་མཐུན་ཕྱོགས་ཉོན་མོངས་དང་སྡུག་བསྔལ་སོགས་ཀྱི་རྐྱེན་དག་གིས་རབ་ཏུ་མི་གཡོ་བར་གཉེན་པོའི་སྟོབས་ཀྱི་བཟུང་བར་བྱ་བའི་སྒོ་ནས་རང་གི་སེམས་དབང་དུ་བྱ་བ་སྟེ། འདི་སེམས་དབང་ དུ་བྱས་ནས་གཟུང་ཚུལ་གྱི་དོན་བསྡུ་བའང་ཡིན་ནོ། །ས་བཟང་འགྲེལ་པར། འདིར། མདོ་རྒྱུན་གྱི་ལུང་། ཕྱེ་མ་ལེབ་དང་འདབ་ཆགས་དང་། །ཞེས་སོགས་ཚིགས་བཅད་དྲངས་ནས་རི་རབ་རྐྱེན་ཆུང་འབྲིང་ཆེ་གསུམ་གྱིས་མི་གཡོ་བ་ལྟར་སྡིག་གྲོགས་སོགས་རྐྱེན་གསུམ་ གྱིས་མི་གཡོ་བར་རབ་ཏུ་བརྟན་པར་གཟུང་བར་བྱ་ཞེས་བཤད་དོ། །དེ་ལྟར་སྒོ་གསུམ་ཀ་ནས་བྱ་མི་འོས་པ་ཉེས་སྤྱོད་ལ་འཇུག་པ་གཉེན་པོས་ཚར་བཅད་ཅིང་ཟིལ་གྱིས་མནན་ནས་བྱ་བར་འོས་པ་དགེ་བའི་ཕྱོགས་ལ་རང་གི་ངང་གིས་འཇུག་པའི་ཕྱིར་དུ་གཉེན་པོའི་སྟོབས་ཀྱི་
