པ་རྣམས་ནི་ཐོག་མར་བརྩམས་པ་དེ་དང་པོར་བསྒྲུབ་པར་བྱ་དགོས་སོ། །
གཉིས་པ་བསླབ་པ་ཉམས་པའམ་ཀུན་སྤྱོད་ཉམས་པ་བསྲུང་བ་ནི། བྲེ་མོའི་གཏམ་ནི་སོགས་ཏེ། དེའང་འདི་ལ་འདིར་སྤྱོད་པ་ཉམས་པ་བསྲུང་བ་ཞེས་བསྟན་ལ། འགྲེལ་པ་ཕལ་ ཆེར་དུ་དོན་མེད་གཡེང་བར་ནས་འདི་ཡན་ཆད་ལ་སྒོ་གསུམ་གྱི་སྤྱོད་པ་ལ་བརྟག་པ་དང་འདི་ནས་བརྟགས་ནས་དབང་དུ་བྱ་བ་ཞེས་འཆད་པར་མཛད་ལ། གང་ལྟར་ཡང་འདི་ནས་བྱ་བ་མ་ཡིན་པ་ལས་ལྡོག་ཚུལ་སྟོན་ལ། དེ་ལ། རྣམ་གཡེང་ལ་ཆགས་པ་ དང་དོན་མེད་ཀྱི་བྱ་བ་སྤོང་བ་ནི། གོང་དུ་བཤད་པ་ལྟར་དགོས་པ་ཆེན་པོ་དང་ལྡན་པའི་དམིགས་བསལ་ཅན་གྱི་སྐབས་འགའ་ཞིག་ཏུ་བཀག་པ་ལ་གནང་བ་ཡོད་ཀྱང་སྤྱིར་འབྲས་བུ་མེད་པའི་དོན་མེད་ཀྱི་སྤྱོད་པ་དང་རྣམ་གཡེང་བྱ་བར་མ་གནང་བས་དེ་ལྟ་བུ་ལ་ སེམས་བསྲུང་དགོས་ཏེ། རྒྱལ་བློན་དང་དམག་ཆོམ་རྐུན་གྱི་གཏམ་དང་འབྲེལ་མེད་ཀྱི་ཀུ་རེའི་གཏམ་སོགས་བྲེ་མོའི་གཏམ་ནི་སྣང་ཚོགས་དང་། མིག་འཕྲུལ་དང་གླུ་བྲོ་ཟློས་གར་སོགས་ཀྱི་ངོ་མཚར་བའི་ལྟད་མོའི་རིགས་རྣམ་པ་སྣ་ཚོགས་པའི་རྣམ་གཡེང་ སྐྱེད་བྱེད་ཀྱི་རྒྱུ་མང་པོ་ལ་དོན་མེད་དུ་རང་ཉིད་འཇུག་པར་མི་བྱ་ཞིང་། གཞན་གྱིས་དེ་དག་བྱེད་པའི་རྗེས་སུ་ཡང་རང་དགར་སྨྲ་ཞིང་མཉན་པ་དང་བལྟ་བ་སོགས་ཀྱི་སྒོ་ནས་འདུག་པར་མི་བྱ་ལ། རྒྱུ་ལ་དགོས་པ་ཡོད་པའི་དབང་ངམ་གཞན་གྱི་ངོ་མི་ལྡོག་ཅིང་། སེམས་མགུ་བསྐྱེད་པའི་ཆེད་དུ་རེས་འགའ་དེ་དག་ཀུན་ལ་འཇུག་དགོས་པར་གྱུར་པ་ན་དེ་ལ་ཆགས་པ་དང་ཞེན་པའི་བསམ་པ་སྤང་བར་བྱས་ནས་སྐྱོ་བ་དང་བཅས་པའི་སྒོ་ནས་འཇུག་པར་བྱ་དགོས་པ་ནི། མཆོག་ཟུང་གཉིས་ཀྱི་རྣམ་ཐར་ལས་བྱུང་བ་ལྟ་བུ་སྟེ།
