༄༅། །ཞེས་གསུངས་པ་ལྟར་རོ། །དེ་བས་ན་ཏིང་ངེ་འཛིན་དོན་དུ་གཉེར་བ་དག་གིས་དྲན་ཤེས་ལ་བརྟེན་ནས་ཚུལ་ཁྲིམས་རྣམ་དག་སྒྲུབ་པའི་ཐབས་ལ་མཁས་པར་བྱ་དགོས་ལ། དེ་བཞིན་དུ་ཚུལ་ཁྲིམས་རྣམ་དག་དོན་དུ་གཉེར་བས་ཀྱང་ཏིང་ ངེ་འཛིན་ལ་ནན་ཏན་བྱ་དགོས་པར་ཡང་གསུངས་ཏེ་ཅུང་ཟད་འོག་ཏུའང་འཆད་ལ་རྒྱུས་པར་བསླབ་བཏུས་སོགས་ལས་ཤེས་པར་བྱའོ། །བཀག་པ་ལ་གནང་བའི་དུས་བསྟན་པ་ནི། སྤྱིར་ཏིང་འཛིན་སྒོམ་པ་སོགས་དགེ་བའི་ཀུན་སྤྱོད་ལས་ཅུང་ཟད་ཀྱང་མི་འདའ་བར་ བརྩོན་དགོས་མོད་ཀྱང་ལས་དང་པོ་བ་ལྟ་བུ་དེ་ལྟར་རྒྱུན་པར་བརྩོན་མི་ནུས་པ་ལ་རེ་ཞིག་ཅི་བདེར་བྱ་བར་གནང་བའི་དམིགས་བསལ་ནི་འདི་ལྟར། མི་སོགས་ཀྱི་དགྲོ་དང་དུག་སྦྲུལ་དང་མེ་ཆུ་སོགས་རང་གི་སྲོག་ལ་གནོད་པའི་འཇིགས་པ་དང་དུས་བཟང་སོགས་ལ་དཀོན་ མཆོག་གི་མཆོད་པ་ལྷག་པར་བཟང་ཞིང་རྒྱ་ཆེ་བ་འབུལ་བ་ལ་སོགས་པའི་དགའ་སྟོན་དང་། དེ་དག་ལས་ཆེས་ལྷག་པའི་གཞན་དོན་རྒྱ་ཆེན་པོ་བྱེད་པ་སོགས་དང་འབྲེལ་བར་གྱུར་པ་ན་ལུས་སེམས་ཤིན་ཏུ་བསྡོམས་པའི་སྤྱོད་ལམ་ཆེས་ཕྲ་བ་བྱ་དཀའ་བའི་རིགས་ གལ་ཏེ་རང་གིས་བྱ་མི་ནུས་པ་བྱུང་ན་རེ་ཞིག་དེ་དག་དང་རྗེས་སུ་མཐུན་པའི་སྤྱོད་ལམ་བག་ཡངས་སུ་ཅི་བདེར་བྱ་བའི་སྒོ་ནས་འཇུག་པར་བྱ་བ་གནང་བས་དེ་ལྟར་བྱས་པ་ལས་ལྟུང་བ་མི་འབྱུང་ཞིང་དེ་ནས་སླར་ཡང་སྔར་བཞིན་ལུས་སེམས་སྡོམ་པའི་ཀུན་སྤྱོད་ལ་གནས་པར་ བྱ་སྟེ། དེ་ཡང་འདི་ལྟར་སྤྱིར་སྦྱིན་པ་ལས་ཚུལ་ཁྲིམས་བརྒྱ་འགྱུར་གྱི་ལྷག་པས་ཚུལ་ཁྲིམས་བཏང་སྙོམས་བུ་བྱ་མི་རིགས་ཀྱང་ལས་དང་པོ་བས་ཐོག་མར་གཉིས་ཀ་དུས་གཅིག་ཏུ་སྒྲུབ་མི་ནུས་ཤིང་སྦྱིན་པ་ལ་གཙོ་བོར་སློབ་པའི་དུས་དག་ཏུ་རེ་ཞིག་དེ་ཉིད་ལ་གོམས་
