༄༅། །འགྲོ་བའི་ཚེ་ཡང་མདུན་དང་རྒྱབ་དག་ཏུ་གཡང་ས་དང་ཆོམ་རྐུན་དང་གཅན་གཟན་དང་དུག་སྦྲུལ་སོགས་ཀྱི་འཇིགས་པ་ཡོད་མེད་ལེགས་པར་བརྟགས་པར་བྱས་ནས་མདུན་ཕྱོགས་སུ་འཇིགས་པ་མེད་ན་འགྲོ་བར་བྱ་ལ་ཡོད་ཚེ་འཇིགས་པ་དེ་ལས་བཟུར་ ནས་འགྲོ་བའམ་ཡང་ན་དེ་ཕྱོགས་སུ་མི་འགྲོ་བར་ཕྱིར་ལོག་ནས་འོང་བར་བྱ་བ་སྟེ། དེ་ལྟར་བལྟ་བ་དང་འགྲོ་བའི་སྤྱོད་པ་དང་འབྲེལ་བའི་བསླབ་བྱ་འདིས་མཚོན་ནས་སྤྱོད་ལམ་རྣམ་བཞིའི་གནས་སྐབས་ཐམས་ཅད་དུ་དྲན་ཤེས་ཀྱིས་ཟིན་པའི་སྒོ་ནས་རང་གཞན་ལ་ཕན་པའི་དགོས་པ་ ཡོད་མེད་ཤེས་པར་བྱས་ནས་དགོས་པའི་དོན་དང་འབྲས་བུ་ཡོད་པ་རྣམས་ལ་སྤྱད་པར་བྱའོ། །ལུས་ཀྱི་ཀུན་སྤྱོད་ལ་བརྟག་པ་ནི། འགྲོ་འཆག་ཉལ་འདུག་བཞི་ཀའི་སྐབས་སུ་ལུས་ཀྱིས་འདི་ལྟར་གནས་པར་བྱའོ་ཞེས་སམ་སྤྱད་པར་བྱའོ་ཞེས་བློའི་འཕེན་པ་སྔོན་དུ་བཏང་ནས་དེ་ནས་ ཀློག་སྤོང་སོགས་ཀྱི་དགེ་བ་དང་འབྲེལ་བའི་བྱ་བ་གང་ཡིན་པ་དེ་དང་དེ་བསྡོང་ནས་ཞེས་ཏེ་ཉེར་བསྡོགས་བྱ་བའམ་མགོ་བརྩམས་ནས་ཞེས་པའམ། ཡང་དཔེ་འགའ་ཞིག་ཏུ་བྱ་བ་རྟོགས་ནས་ཞེས་སྣང་སྟེ་དེའི་དོན་ནི་བྱ་བའི་དོན་གང་ཡིན་དེ་རྟོགས་ཤིང་ངེས་པར་བྱས་ནས་ཞེས་པ་ ཡིན་ལ། གང་ལྟར་ཡང་དེ་ནས་ནི་སྐབས་སྐབས་སུའམ་བར་བར་དུ་ལུས་འདི་སྔར་བསམ་པ་བཞིན་གྱི་འགྲོ་བ་དང་འདུག་པ་སོགས་ཀྱི་སྤྱོད་ལམ་དེ་ཉིད་ལ་གནས་མི་གནས་དང་དགེ་མི་དགེ་གང་ལ་འཇུག་སོགས་ཀྱི་སྤྱོད་ལམ་ཇི་ལྟ་བུར་གནས་པ་ཡིན་ཞེས་ཤེས་བཞིན་གྱི་བྱ་ ར་བས་བལྟ་བར་བྱ་ཞིང་། སྔར་གྱི་ཀུན་སྤྱོད་དེ་ཉིད་ལས་གཞན་དུ་སོང་ན་ཡང་སྔར་བཞིན་དུ་གནས་པ་ལ་སྦྱར་བ་སོགས་མདོར་ན་ཉེས་མེད་དགེ་བའི་ཀུན་སྤྱོད་ཀྱིས་གནས་པ་ལ་བརྩོན་པར་བྱའོ། །དེ་བཞིན་དུ། ལུས་ཀྱིས་འདི་ལྟར་འགྲོ་བྱ་དང་འཆགས་བྱ་སོགས་སྦྱར་ནས་ཤེས་
