དེ་ཕེབས་པར་སྨྲ་བའི་ཚིག་གིས་བསུ་བར་བྱའོ། །འདི་དག་གི་ཀུན་སྤྱོད་དེ་ངག་གི་སྤྱོད་པ་གཞན་མཚོན་བྱེད་ཙམ་མོ། །རྒྱུ་དཔེ་དང་རྒྱུ་འགྲེལ་དག་ཏུ། གྲིབ་མ་ཙམ་ཞིག་མཐོང་ན་ཡང་། །ལེགས་འོངས་དོན་དུ་རྣམ་པར་བལྟ། །ཞེས་ཡོད་པ་ནི། གཞན་འོངས་པའི་གྲིབ་ མའམ་མཚན་མའམ་ཞད་བག་ཙམ་མཐོང་མ་ཐག་ཏུ་ལེགས་པར་འོངས་སམ་ཞེས་ཕེབས་པར་སྨྲ་བའི་དོན་དུ་བལྟ་བར་བྱ་ཞེས་པའི་དོན་ཡིན་པར་བཤད་དོ། །དེ་ནི་གཞན་མ་དད་པས་སྡིག་པ་གསོག་པ་སྤོང་བའི་ཆེད་དེ། ཇི་སྐད་དུ། བྱང་ཆུབ་སེམས་དཔའ་སེམས་ཅན་གྱི་ དོན་བྱ་བའི་ཐོག་མར་འགྲོ་བ་ནི་ཚིག་སྙན་པ་ཡིན་པའི་ཕྱིར་རོ། །ཞེས་གསུངས་པ་ལྟར་རོ། །གཞན་ཡང་ཉམ་ང་བའི་ལམ་དང་གྲོང་སོགས་སུ་འཇུག་པའི་ཚེ་གཅན་གཟན་དང་ཆོམ་རྐུན་སོགས་ཀྱི་འཇིགས་པ་ཡོད་མེད་བརྟག་དགོས་པ་ལྟ་བུའི་ཕྱིར་ཡང་དང་ཡང་དུ་ཕྱོགས་ བཞི་ཀར་བལྟ་བའམ་གང་དུ་བལྟ་དགོས་པའི་ཕྱོགས་དེ་དང་དེར་བལྟ་བར་བྱ་སྟེ་རང་གི་ལུས་སྲུང་སོགས་ཀྱི་ཆེད་དུའོ། །ཕྱོགས་བཞིར་བལྟ་བའི་ཚེ་འགྲོ་བཞིན་དུ་བལྟས་ན་རང་གི་སེམས་རྒོད་པར་འགྱུར་བ་དང་གཞན་མ་དད་པར་འགྱུར་བས་ཉེས་པ་དེ་དག་སྤོང་བའི་ཕྱིར་དང་ ཁྱད་པར་རྒྱབ་ཕྱོགས་སུ་བལྟ་དགོས་པ་ལྟ་བུ་བྱུང་ན་འགྲོ་བཞིན་དུ་བལྟ་བ་མི་བདེ་བས་དེ་དག་གི་ཕྱིར་བསྡད་ནས་ངལ་གསོ་སྟེ་གར་བལྟ་དགོས་པའི་ཕྱོགས་སུ་བལྟ་བའམ་ཁ་ནི་ཕྱིར་བལྟས་ཏེ་རྒྱབ་ཀྱི་ཕྱོགས་སུ་བལྟ་བར་བྱ་ཞེས་སམ། ཡང་ན་ཡང་དང་ཡང་དུ་ཕྱོགས་བཞིར་བལྟ་ ལ་ཁྱད་པར་ངལ་གསོ་བའི་ཚེ་ཁ་ནི་ཕྱིར་བལྟས་ནས་རྒྱབ་ཀྱི་ཕྱོགས་སུ་ཚུར་འོང་མཁན་སོགས་ཡོད་མེད་བལྟ་བར་བྱ་ཞེས་པའོ། །ཡང་ངལ་སོས་ནས་འགྲོ་རན་པའི་ཚེ་ཁ་ཕྱིར་བལྟས་ནས་ངལ་གསོའི་ས་དེར་ཡོ་བྱད་ལྟ་བུ་ལུས་པ་ཡོད་མེད་བལྟ་ཞེས་པའང་སྣང་ངོ༌། །སྤྱིར་གང་དུ་
