གཉིས་ཀྱི་བར་དུ་བཅར་བའི་སྡུག་བསྔལ་མྱོང་དགོས་པར་རྣམ་སྣང་གསུང་ངོ་། །བསྒྲིམས་ཏེ་སེམས་བསྲུངས་པའི་ཕན་ཡོན་ནི། དྲན་ཤེས་བསྟེན་ཏེ་རང་གི་སེམས་ཉོན་མོངས་པའི་རྨ་ལས་སྲུང་བའི་སྤྱོད་པ་འདི་འདྲས་དུས་རྒྱུན་པར་གནས་པར་བྱེད་ན་ཞེ་སྡང་སྐྱེ་ཡུལ་གྱི་ སྐྱེ་བོ་ངན་པ་མི་རིགས་པ་སྣ་ཚོགས་པ་བྱེད་པ་མང་པོའི་ཁྲོད་ན་གནས་སམ། འདོད་ཆགས་སྐྱེ་ཡུལ་གྱི་བུད་མེད་མཛེས་སྡུག་ལྡན་པ་གཡོ་ཐབས་ཅན་མང་པོའི་ཁྲོད་ན་གནས་གང་རུང་སྟེ་རང་རྒྱུད་ཀྱི་བསླབ་སྡོམ་བསྲུང་བ་ལ་གུས་ཤིང་སྤྲོ་བའི་བརྩོན་པ་ཅན་གྱི་སྡོམ་སེམས་ བརྟན་པའམ་བག་ཡོད་བརྟན་པོ་ཉམས་ཤིང་ཞིག་པར་མི་འགྱུར་ཏེ་བསླབ་པ་སྲུང་འདོད་ཀྱི་གཉེན་པོའི་ཡིད་བྱེད་བརྟན་པོ་ཅུང་ཟད་ཀྱང་འཁྲུལ་པར་མི་འགྱུར་བས་སོ། །ཡང་ཁོང་ཁྲོ་ཅན་གྱི་སྐྱེ་བོ་ངན་པའི་ཁྲོད་དང་ཆགས་པ་ཅན་གྱི་བུད་མེད་ཀྱི་ཁྲོད་ཅེས་ཀྱང་གསུངས་སོ། ། སེམས་བསྲུང་བ་ལ་འབད་པར་གདམས་པས་དོན་བསྡུ་བ་ནི། བདག་གི་བསོད་སྙོམས་ཆོས་གོས་སོགས་ཟས་གོས་ཀྱི་རྙེད་པ་དང་ཕྱག་འཚལ་བ་དང་གདན་སྟོབ་པ་སོགས་ཀྱི་བཀུར་སྟི་དང་ལུས་དང་སྲོག་གི་རྒྱུན་བདེ་བར་གནས་པའི་རྐྱེན་དུ་གྱུར་པའི་འཚོ་བ་སྟེ་ཟས་གོས་ སོགས་ཀྱི་འཚོ་བའི་ཡོ་བྱད་དམ་ཡང་ན་འཚོ་བའི་ཚེ་སྲོག་ལ་སོགས་པ་ཉམས་ནས་མེད་པར་གྱུར་ཀྱང་བླ་ཞིང་། གཞན་ཕན་གྱི་བསམ་པ་སྲུང་བའི་ཐབས་སུ་མི་འགྱུར་བའི་ལུས་ངག་གི་དགེ་བ་གཞན་དང་བདེ་བ་དང་ཡིད་བདེ་སྐྱེད་བྱེད་ཀྱི་རྒྱུ་གཞན་གང་ཡང་རུང་བ་དག་ཉམས་ པ་བླ་ཡི་སྟེ་ཉམས་སུ་ཆུག་གི་ཐེག་ཆེན་སེམས་བསྐྱེད་དང་བསླབ་པ་སྲུང་བའི་ཐབས་སུ་དྲན་ཤེས་ལ་བརྟེན་ནས་རང་གི་སེམས་བསྲུང་བའི་བརྟུལ་ཞུགས་འདི་ནི་དུས་ནམ་གྱི་ཚེ་ཡང་ཉམས་པར་མི་བྱའོ་ཞེས་པ་སྟེ། དོན་བསྡུས་ན་བདག་གིས་བསམ་པ་དགེ་བ་བྱང་ཆུབ་
