༄༅། །འདིས་ནི་དུས་ཇི་སྲིད་ཀྱི་བར་དུ་སེམས་བསྲུང་དགོས་སྙམ་ན་དུས་རྟག་ཏུ་བསྲུང་དགོས་ཞེས་བསྟན་པའོ། །ཉེས་དམིགས་ཇི་ལྟར་སྐྱེད་ན། ཐ་མལ་གྱི་རྨ་མ་བསྲུངས་པར་ཉམས་པ་ཡི་སྡུག་བསྔལ་ཆུང་ངུ་འབྱུང་བ་ཡིས་འཇིགས་ཤིང་སྐྲག་ པའང་རྨ་དེ་སྲུང་བ་ཡི་ཆེད་དུ་འཛེམ་བག་བྱེད་ན་སེམས་ཀྱི་རྨ་མ་བསྲུངས་པས་ཉོན་མོངས་པ་སྐྱེས་ནས་དེའི་དབང་གིས་སྡིག་ལྟུང་སོགས་བྱུང་བས་ཉམས་པར་གྱུར་ན་ཕྱི་མར་དམྱལ་བ་བསྡུས་འཇོམས་ཀྱི་གནས་སུ་སྲོག་ཆགས་སྣ་ཚོགས་པའི་མགོ་བརྙན་ཅན་གྱི་རི་ཆེན་ པོའི་བར་དུ་བཅར་བས་ལུས་འཇོམས་པར་བྱེད་པའི་སྡུག་བསྔལ་ཚབས་ཆེན་སྟོང་ཕྲག་དུ་མ་ལ་སྐྲག་པ་ཡིས་སམ་དག་གིས་དྲན་ཤེས་བསྟེན་ནས་སེམས་ཀྱི་རྨ་ལྟ་ཅིས་མི་བསྲུང་སྟེ་ཅི་ནས་བསྲུང་བར་བྱ་རིགས་ཏེ་གལ་ཏེ་མ་བསྲུངས་པས་ཉམས་ན་སྔ་མ་ལས་ཆེས་ ཆེར་ལྷག་པའི་ཉེས་དམིགས་ཆེན་པོ་སྐྱེད་པ་དེའི་ཕྱིར་རོ།།ར་ཡང་མ་གྲངས་གྲོལ་བ་རྒྱ་གར་གྱི་སྐད་དོད་གཅིག་ལ་བོད་སྐད་གཉིས་སུ་བསྒྱུར་བ་སྟེ་མཉམ་པར་མ་བཞག་པས་མ་གྲངས། རྣམ་པར་གཡེངས་པས་གྲོལ་བ་སྟེ་མ་བསྡམས་པར་སྤྱོད་པ་རང་ཡན་དུ་སོང་ བའི་བྱིས་པ་ཙབ་ཀྲོལ་ཅན་ཞེས་བུ་སྟོན་སོགས་གསུང་ངོ༌། །སྐྱེས་བུ་དམ་པས་མ་དྲངས་ཞེས་བཤད་པའང་བྱུང་ངོ༌། །སེམས་ཉམས་ན་ངན་སོང་དུ་སྐྱེ་བ་ལས་འདིར་བསྡུས་འཇོམས་ཞེས་ཁྱད་པར་དུ་སྨོས་པ་ནི་རྨ་བཅར་བ་དང་ཆོས་མཚུངས་སྒྱུར་བས་ཡིན་སྙམ་མོ། ། ལུག་ལྟ་བུའི་རི་བོ་དག་ཕྱོགས་གཉིས་ནས་འོངས་པས་ཤིག་ལ་སོགས་པ་བཅར་བ་ལྟར་དེ་དག་འཇོམས་པར་སྐྲག་པས་སེམས་ཀྱི་རྨ་ལྟ་ཅིས་མི་སྲུང་ཞེས་དགེ་ལྷ་འཆད་ལ།སེན་མོའི་བར་དུ་ཤིག་བཅར་ནས་བསད་པས་བསྡུས་འཇོམས་སུ་སྐྱེས་ནས་ལྕགས་ཀྱི་རི་
