མ་དང་བཅས་བཞིན་དུ་བརྩོན་མི་རིགས་སོ་སྙམ་ན། །འཇིག་རྟེན་ན་ཉ་གཤོར་བས་འཚོ་བའི་ཉ་པ་སོགས་ཀྱི་རྔོན་པ་དང་། ཕྱུགས་གསོད་པའི་ཤན་པ་ལ་གདོལ་བ་ཞེས་བརྗོད་པ་དེའམ་གཞན་གྱི་ནོར་རྐུ་འཕྲོག་བྱེད་པའི་ཆོམ་རྐུན་ལ་སོགས་པའི་གདོལ་བ་དང་ ཞིང་ལ་ས་བོན་འདེབས་པ་དང་རྨོད་པ་སོགས་སོ་ནམ་གྱི་ལས་ཀྱིས་འཚོ་བའི་ཞིང་པ་དང་། ལ་སོགས་ཞེས་པས་བསྟན་པ་ཁེ་ཆེན་པོ་ཐོབ་པའི་ཕྱིར་ཉོ་ཚོང་སྣ་ཚོགས་བྱེད་པའི་ཚོང་པ་དང་གཞན་གྱི་ཟས་གོས་ཙམ་ལ་བསྟེན་ནས་འཚོ་བའི་བྲན་གཡོག་ བྱེད་པ་ལ་སོགས་པ་རྣམས་རང་དང་རང་གི་ཆུང་མ་དང་བུ་དང་བུ་མོ་སོགས་ཀྱི་ཚེ་འདིའི་ཟས་གོས་སོགས་ཀྱི་འཚོ་བ་ཙམ་ཞིག་སེམས་ཤིང་སྒྲུབ་པར་བྱེད་པ་ལྟ་བུ་འཇིག་རྟེན་པའི་དགོས་པ་དམན་པ་རེ་སྒྲུབ་པའི་ཆེད་དུ་ཡང་གྲང་བ་དང་ཚ་བ་རླུང་དང་ཆར་པ་སྡིག་ སྤྲུལ་དང་གཅན་གཟན་ལ་སོགས་པའི་གནོད་པ་ཐམས་ཅད་ལ་བསྲན་བཙུགས་ནས་སྲོག་དང་བསྡོས་ཏེ་ཉིན་མཚན་དུ་བྱ་དཀའ་བའི་ལས་ཐམས་ཅད་བཟོད་པར་བྱེད་ན། མཐའ་ཡས་པའི་འགྲོ་བ་མ་ལུས་པའི་ཕན་བདེ་སྒྲུབ་པའི་སྐྱེས་བུ་མཆོག་གི་དོན་གྱི་ ཕྱིར་ཆོས་ལ་དཀའ་སྤྱད་ཀྱི་སྡུག་བསྔལ་བདག་གིས་ལྟ་ཅིས་མི་བཟོད་ཅེས་སམ་བདག་ལྟ་བུས་ཅིས་མི་བཟོད་དེ་བཟོད་རིགས་སོ་སྙམ་དུ་དཀའ་སྤྱད་ཀྱི་སྡུག་བསྔལ་ལ་མི་འཇིགས་པའི་བློ་བསྐྱེད་པར་བྱའོ། །ཡ་སདེ་དག་ནི་རྒྱན་ལས། གཞན་ལ་ཕན་བའི་ སྡུག་བསྔལ་ལ་རྟག་ཏུ། །ཕན་པའི་འདུ་ཤེས་དགའ་བ་རྙེད་གྱུར་པ། །ཞེས་སོགས་ལྟར་རོ། །འདི་དག་གིས་ཉོན་མོངས་སྤོང་བའི་དཀའ་སྤྱད་ལ་ཁུར་དུ་མི་འཛིན་པར་རྒྱུན་དུ་ལྟ་བའི་སྒོ་ནས་སེམས་ཀྱི་སྤྲོ་བའི་སྟོབས་བསྐྱེད་ཚུལ་བསྟན་ཏོ། །གོང་དུ་
