མེད། ཅེས་གསུངས་པ་དེ་གཞན་དོན་དུ་གཞུང་འདི་བརྩམས་པ་མིན་ཞེས་པའི་དོན་མིན་གྱི། དེ་ཕྱིར་ཞེས་པའི་ཚིག་གི་ནུས་པའི་སྒོ་ནས་འདིས་གཞན་དོན་རྒྱ་ཆེན་པོ་འགྲུབ་སྙམ་པའི་ང་རྒྱལ་གྱི་བསམ་པ་མེད་ཅེས་ཁེངས་སྐྱུངས་མཛད་པའི་དོན་ཡིན་པར་ཤེས་པར་བྱའོ། །
སྐབས་འདིའི་ས་བཅད་དུ་སྤྲོ་བ་བསྐྱེད་པ་ཅེས་སྨོས་པའང་ཐོག་མར་རང་རྒྱུད་ལ་དད་སོགས་འཕེལ་བ་དང་དེ་ནས་གཞན་ལའང་ཕན་པར་འགྱུར་བ་སོགས་གང་ལ་བསམས་ཀྱང་རང་ཉིད་བསྟན་བཅོས་རྩོམ་པ་ལ་སྤྲོ་བ་སྐྱེད་རིགས་པ་དང་གཞན་དག་ཀྱང་སྤྲོ་བ་བསྐྱེད་ནས་འཇུག་རིགས་
པའི་དོན་གྱིས་དེ་སྐད་བརྗོད་པའོ། །རང་གཞན་ལ་ཕན་པའི་དགོས་པ་ཡོད་ཅེས་པ་འདིས་བསྟན་བཅོས་ཀྱི་དགོས་པ་དང་ཉིང་དགོས་བསྟན་པ་ཡིན་པས་དགོས་སོགས་བཞི་འདིར་བཤད་ཀྱང་འབྲེལ་ལ། དགོས་སོགས་ཡོད་པར་བསྟན་པའང་འདི་ལ་གཞན་དག་འཇུག་པའི་དོན་
དུ་བསྟན་པ་ཡིན་པས་འདིས་ཀྱང་གཞན་ལ་ཕན་པའི་རེ་བ་ཡོད་པར་བསྟན་པ་ཤེས་པར་བྱའོ། །མདོར་ན་དེ་དག་གིས་རང་སྟོབས་ཀྱིས་ལུང་དོན་རྟོགས་ནུས་པ་རྣམས་གཞུང་འདིར་ལྟོས་མི་དགོས་ལ་གཞན་ཁེངས་དྲེགས་ཅན་སོགས་ཀྱི་དོན་དུ་མི་འགྱུར་ཡང་བ་སྐལ་མཉམ་དད་ལྡན་
སོགས་ལ་ཕན་པའི་དོན་དུ་འགྱུར་ཞེས་བསྟན་པ་ཡིན་ནོ། །
གཉིས་པ་བརྩམ་བྱ་བསྟན་བཅོས་ལུས་ཀྱི་རང་བཞིན་དངོས་ལ་གཉིས། གཞུང་སྤྱིའི་རྣམ་གཞག །བསྟན་བཅོས་ལུས་ཀྱི་རང་བཞིན་དངོས་སོ། །
དང་པོ་ནི། སློབ་དཔོན་ནག་པོ་པས་ཚིགས་བཅད་དང་ པོ་གསུམ་གྱིས་བསྟན་བཅོས་འབྱུང་བའི་རྒྱུ་བསྟན་ལ། དེ་ནས་ལེའུ་དང་པོ་གསུམ་དང་བསྔོ་བའི་ལེའུས་སྦྱིན་པ། ལེའུ་བཞི་བ་དང་ལྔ་བས་ཚུལ་ཁྲིམས། དྲུག་པ་སོགས་ལེའུ་བཞིས་ཕར་ཕྱིན་ལྷག་མ་བཞི་སྟེ་སྤྱོད་པ་ཕྱིན་དྲུག་དང་། མཇུག་བཀའ་དྲིན་དྲན་པའི་ཕྱག་དང་
