ཉམས་ན་ཕྱིར་བཅོས་ཚུལ་མི་འདྲ་བའི་ཁྱད་པར་དེ་ཡང་མི་འཐད་དེ། ཕྱོགས་སྔ་མ་ཁྱེད་ཅག་གིས་སླར་ཡང་དབུ་མ་པའི་ལུགས་ཀྱི་ཕྱིར་བཅོས་ཚུལ་འཆད་པ་ན་ཐུན་ཚོད་འདས་ཏེ་རྩ་ལྟུང་བྱུང་ན་སྡོམ་པ་སླར་ཡང་བླང་བར་བྱ་ཞེས་པ་རང་ཚིག་དངོས་འགལ་ ཡིན་པ་སོགས་ཀྱི་ཕྱིར་རོ། །གཞན་ཡང་ཕལ་ཆེ་བ་ཞིག་གིས་དབུ་མ་པའི་ལུགས་ཀྱི་བསླབ་བྱ་འཆད་པ་ན་སྨོན་འཇུག་ཐུན་མོང་གི་བསླབ་བྱར། ཐེག་ཆེན་གྱི་བཤེས་གཉེན་མི་གཏོང་བ། མཆོག་གསུམ་གྱི་གདུང་མི་བཅད་པ། །སེམས་ཅན་བློས་མི་སྤོང་ བ་སྟེ་གསུམ་དང༌། ལྟུང་བ་ལྟུང་མེད་ལྟུང་བའི་གཟུགས་བརྙན་ལྟུང་མེད་ཀྱི་གཟུགས་བརྙན་རྣམས་ཤེས་པར་བྱ་བ་དང༌། འཇུག་སྡོམ་གྱི་བསླབ་བྱ་རྒྱས་པར་ཚུལ་ཁྲིམས་གསུམ་དང་། ཕྱིན་དྲུག་ལ་སློབ་པ། སྤྱོད་འཇུག་བསླབ་བཏུས་བྱང་ས་སྡོམ་པ་ཉི་ཤུ་བ་རིན་ ཆེན་ཕྲེང་བ་མདོ་ཀུན་བཏུས་རྣམས་ནས་འབྱུང་བའི་བསླབ་བྱ་ཐམས་ཅད་དང༌། ནམ་སྙིང་སྡོང་པོ་བཀོད་པ་བྱང་ཆུབ་སེམས་དཔའི་སྡེ་སྣོད་སྤྱན་རས་གཟིགས་ཀྱིས་ཞུས་མདོ་དཔུང་བཟང་རྣམ་སྣང་མངོན་བྱང་སོགས་ནས་གསུངས་པའི་བསླབ་བྱ་རྣམས་ལ་ཅི་ནུས་ སུ་སློབ་པའོ། །དེ་ཙམ་མི་ལྕོགས་ན་སྨོན་སེམས་མི་འདོར། ལོག་ལྟ་མི་བསྐྱེད། ནག་ཆོས་བཞི་སྤངས་པ་ཙམ་ལ་བསླབ་པས་ཆོག །དེ་ཙམ་ཡང་མི་འགྲུབ་པས་ལས་དང་པོ་བས་བསླབ་བྱ་ཐམས་ཅད་ཀྱི་དོན་བསྡུ་ན་བསམ་སྦྱོར་གཉིས་སུ་འདུས་པས་སྨོན་ པའི་བསླབ་བྱར་སེམས་བ་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་པ་དང༌། འཇུག་པའི་བསླབ་བྱ་དོན་མེད་པའི་སྒོ་གསུམ་གྱི་སྡིག་པ་ཅི་ནུས་སློང་ཞིང་བསོད་ནམས་ཀྱི་ལས་ལ་ཅི་ནུས་སུ་འབད་པའོ། །དེ་ལྟར་གསུམ་ལས། ལས་དང་པོ་བའི་སྐབས་
