༄༅། །ལ་རིང་དུ་བརྟག་ཅིང་དཔྱད་དེ་འདྲིས་པར་བྱས་ནས་རྩོམ་པ་ལ་འཇུག་པ་ཡིན་ལ། དེའི་ཕྱིར་བདག་གི་རྒྱུད་ལ་དད་འདོད་ཡིད་ཆེས་ཀྱི་དད་པའི་ཤུགས་སམ་རྒྱུན་ནི་རབ་བྱེད་ཀྱི་སགཞུང་དུ་བཀོད་པ་འདི་དག་གིས་ཀྱང་རེ་ཞིག་སྟེ་དང་པོར་རང་གི་རྒྱུད་ལ་གོང་འཕེལ་ དུ་འབྱུང་བར་འགྱུར་ལ་ཞེས་པ་སྟེ། རེ་ཤིག་ནི་རིམ་པ་སྟོན་པའི་ཚིག་ཡིན་པས་སོ། །དེའང་བསྒོམ་ཕྱིར་ཞེས་པ་འདིས་ཐོས་པ་ཙམ་དང་ཚིག་བློ་ལ་ཤར་ཞིང་ཁོང་དུ་ཆུད་པ་ཙམ་གྱིས་དོན་ཇི་ལྟ་བ་བཞིན་རྒྱུད་ལ་སྐྱེ་མི་ནུས་པས་ཉོན་མོངས་སྤོང་བ་སོགས་ཀྱི་བྱ་བ་བྱེད་མི་ནུས་ལ། དེར་མ་ཟད་ནན་ཏན་གྱིས་གོམས་ཤིང་། འདྲིས་པར་མ་བྱས་ན་ཐོས་ཤིང་ཤེས་པ་རྣམས་ཀྱང་བརྗེད་པར་འགྱུར་བ་དང༌། དལ་འབྱོར་རྙེད་དཀའ་དང་བྱང་ཆུབ་སེམས་ཀྱི་ཕན་ཡོན་སེམས་པ་སོགས་ལམ་གྱི་རིམ་པའི་དོན་དེ་རྣམས་ལ་ཡང་ཡང་སེམས་པ་དང་འཇལ་བ་དང་ངེས་པར་རྟོག་ པས་ཡུན་རིང་དུ་གོམས་ཤིང་འདྲིས་པར་བྱས་པ་ལས་དེའི་རྒྱུན་གོང་འཕེལ་དུ་འགྱུར་བ་དང་གོམས་པ་མཐར་ཕྱིན་ན་དོན་གསལ་བར་མངོན་སུམ་དུ་འགྱུར་བ་སོགས་ཀྱི་དགོས་པའི་དོན་དེ་དག་འགྲུབ་པར་འགྱུར་བའང་བསྟན་ཏོ། །དེ་ཡང་སྒོམ་ཞེས་པ་ནི། སེམས་དགེ་བའི་དམིགས་ པ་ལ་ཡང་དང་ཡང་དུ་གཏོད་པའི་དམིགས་རྣམ་གྱི་རྒྱུན་སྐྱོང་བ་གོམས་ཤིང་འདྲིས་པར་བྱ་བའི་དོན་ཏེ། སློབ་དཔོན་ཆོས་བཤེས་ཀྱིས། སྒོམ་པར་བྱེད་པ་ཞེས་བྱ་བ་ནི་ཡིད་དེའི་སྐལ་བ་ཅན་དུ་བྱེད་པའམ་དེའི་དངོས་པོར་བྱེད་པའོ་ཞེས་གསུངས་པ་ལྟར་ཡིན་ཏེ། དཔེར་ན་དད་ པ་སྒོམ་པ་སྙིང་རྗེ་སྒོམ་པ་ཞེས་པ་ནི་ཡིད་དེ་དང་དེའི་རྣམ་པ་ཅན་དུ་སྐྱེད་པ་ལ་བྱ་དགོས་པ་བཞིན་ནོ། སྒོམ་པ་དང་གོམས་པ་གཉིས་དོན་གཅིག་ཅིང་སྐད་དོད་ཀྱང་གཅིག་པའི་ཕྱིར་ལོ་ཙཱ་བ་རྣམས་ཀྱིས་ཀྱང་རེས་འགའ་སྒོམ་པའི་ལམ་ཞེས་པར་བསྒྱུར་ལ་རེས་གོམས་པའི་ལམ་ཞེས་བསྒྱུར་
