༄༅། །མཁས་པས་སྤྱད་ན་ཉེས་པ་མི་དགེ་བ་ཡང་མེད་ལ་བསོད་ནམས་མང་པོ་འཕེལ་བའང་ཡོད་པར་གསུངས་པས་དེ་ལྟ་བུའི་སྐབས་སུ་ངེས་པར་འདི་དག་སྤྱད་དགོས་པར་བསྟན་པ་ཡིན་ནོ། །དེ་ལྟར་གཞན་དོན་དང་འབྲེལ་བའི་དགོས་པ་ཆེན་པོ་མཐོང་ན་སོ་ཐར་གྱི་བཅས་རྐྱང་ཐུན་མོང་བ་རྣམས་ལ་འདས་ཀྱང་ཉེས་པ་མེད་པའི་ཚུལ་སྔ་མ་བཤད་མ་ཐག་པའི་རྗེས་སུ་དཔག་སྟེ་ཤེས་པར་བྱའོ། །
གཉིས་པ་རང་གཙོ་བོར་གྱུར་པའི་ཚུལ་ཁྲིམས་དང་འགལ་བ་ལ་གསུམ་ལས།
འཚོ་བ་ཉམས་པ་ནི། འཚོ་བ་ ལོག་པ་དང་དུ་ལེན། །ཞེས་ཏེ། ཚུལ་འཆོས་སོགས་ལ་བསྟེན་པའི་འཚོ་བ་ལོག་པ་ལྔ་གང་རུང་བྱུང་བ་དང་དུ་ལེན་ཞིང་དེ་དག་གིས་ངོ་ཚ་ཞིང་འཛེམ་པར་མི་བྱེད་ལ་གཉེན་པོས་སེལ་བར་མི་བྱེད་ན་ཉོན་མོངས་ཅན་གྱི་ཉེས་བྱས་ཏེ་འདི་ལ་ཉོན་མོངས་ཅན་མིན་པ་མེད་དོ། ། དེ་བསལ་བའི་ཕྱིར་འདུན་པ་བསྐྱེད་ཀྱང་ཉོན་མོངས་པ་ཤས་ཆེ་བ་ལ་བཅས་འགལ་གྱི་ཉེས་པ་མེད་པ་ནི་ཉེས་བྱས་གཉིས་པའི་སྐབས་ལྟར་རོ། །
ལོག་འཚོ་ལྔ་ནི། ཚུལ་འཆོས་རྙེད་དང་བཀུར་སྟིའི་ཕྱིར། །དབང་པོ་སྡོམ་པར་བྱེད་པ་སྟེ། །ཁ་གསག་རྙེད་དང་བཀུར་ སྟིའི་ཕྱིར། །ཚིག་འཇམ་སྔར་ནི་སྨྲ་བའོ། །གཞོགས་སློང་དེ་ནི་ཐོབ་བྱའི་ཕྱིར། །གཞན་གྱི་རྫས་ལ་བསྔགས་བྱེད་པ། །ཐོབ་ཀྱིས་འཇལ་བ་རྙེད་པའི་ཕྱིར། །མངོན་སུམ་གཞན་ལ་སྨོད་བྱེད་པ། །རྙེད་པས་རྙེད་པ་རྣམས་འདོད་པ། །སྔར་ཐོབ་པ་ལ་བསྔགས་བྱེད་ པའོ། །ཞེས་རིན་ཆེན་ཕྲེང་བ་ལས་གསུངས་པ་ལྟར་རོ། །གཞན་ཡང་ཆང་དང་མཚོན་ཆ་དང་དུག་དང་སྲོག་ཆགས་དང་རྒྱ་སྐྱེགས་སོགས་འཚོང་བ་དང་མ་བརྟགས་པའི་ཏིལ་དང་ཡུངས་དཀར་འཚོང་བ་སོགས་དང་ཞིང་ལས་སོགས་ཀྱང་ལོག་འཚོར་བཤད་དོ། །
