༄༅། །བཟུང་ནས་བྱང་སེམས་ཀྱི་བསླབ་པ་ལ་ཚུལ་བཞིན་དུ་སློབ་པར་ནུས་པ་བདག་པས་གཞན་གཅེས་ཀྱི་བྱང་ཆུབ་ཀྱི་སེམས་དང་ལྡན་པས་བདག་གཞན་བརྗེ་ནུས་པ་དུག་གསུམ་གྱི་བསམ་པ་ཅུང་ཟད་ཙམ་ཡང་མེད་ལ་སྲོག་གཅོད་སོགས་ ལས་ཐབས་གཞན་གང་ཡང་མ་རྙེད་པའི་སྐབས་སུ་དེ་འདྲའི་བྱང་སེམས་ལ་གཞན་དོན་དུ་འགྱུར་བ་མཐོང་ན་སྲོག་གཅོད་པ་སོགས་ལུས་ངག་གི་བདུན་ལ་གནང་པའི་སྐབས་ཡོད་པར་འདིས་སྟོན་པ་ཡིན་ལ། དེའང་ཚུལ་ཁྲིམས་ལེའུའི་གཞུང་དང་སྡོམ་པ་ ཉི་ཤུ་བའི་འགྲེལ་བ་རྙིང་མ་སོགས་ལས་ལུས་ངག་གི་བདུན་ལ་གནང་བའི་སྐབས་ཡོད་པར་སྟོན་པ་མ་གཏོགས་གཞན་དོན་དུ་དེ་དག་ལ་མ་ཞུགས་ན་ཉེས་བྱས་སུ་གསུངས་པ་མེད་ལ། སློབ་དཔོན་བྱང་བཟང་གིས་ཉེས་བྱས་ཞེ་དྲུག་ཏུ་བཤད་པ་ལྟར་ན་འདི་ཡང་ ཉེས་བྱས་གཅིག་ལ་བགྲང་དགོས་པས་གཞན་དོན་དུ་དེ་དག་ལ་མ་ཞུགས་ན་ཉེས་བྱས་ཞེས་བཤད་དགོས་སོ། །འོན་ཀྱང་འདི་བྱང་སེམས་དང་ཉན་ཐོས་ཀྱི་རང་བཞིན་གྱི་བཅས་པ་ལ་སློབ་པའི་ཁྱད་པར་བསྟན་པ་ཙམ་ཡིན་པ་ལས་ལོགས་སུ་ཉེས་བྱས་སུ་མི་ བྱེད་པ་འདྲ་ལ་དེ་ལྟར་ན་ཉེས་བྱས་ཞེ་ལྔའོ། །ལུས་ངག་གི་བདུན་གནང་བའི་རྟེན་གྱི་བྱང་སེམས་ནི་ཕྱིན་དྲུག་ལ་སྤྱོད་པ་ཙམ་གྱིས་མི་ཆོག་གི་བསྐལ་བ་དུ་མར་ལམ་ལ་གོམས་པ་ཐབས་ལ་མཁས་ཤིང་སྙིང་རྗེ་ཆེན་པོ་དང་ལྡན་པ་སོགས་གོང་སྨོས་ལྟར་དགོས་ ཀྱི་ཐེག་ཆེན་པ་ཐམས་ཅད་ལ་གནང་བ་མིན་ནོ། །དེ་འདྲ་ལ་གནང་ཚུལ་ཡང་། བྱང་སེམས་རབ་བྱུང་ལ་མི་ཚངས་སྤྱོད་གནང་བ་མེད་ཅིང་སྲོག་གཅོད་སོགས་གཞན་དྲུག་གནང་བ་ཡོད་དེ། དེའི་རྒྱུ་མཚན་ནི། སྲོག་གཅོད་མ་བྱིན་ལེན་བརྫུན་རྣམས་ལ་
