སུ་གཟུང་མི་དགོས་སོ་ཞེས་བར་ཆད་བྱེད་པ་བཟློག་པས་ཞེས་དང༌། སྐལ་མཉམ་ལ་བསྐུལ་བས་ནི་དེ་དག་དད་པར་འགྱུར་ཞིང་དད་པ་དང་ལྡན་པའི་སྣོད་དུ་བསྟན་བཅོས་བཞག་པར་རིགས་སོ་ཞེས་དགོངས་པས་ཞེས་པ་སོགས་སློབ་དཔོན་ཆེན་པོ་ཀྲྀཥྞ་པ་གསུང་ངོ༌། །འོ་ན་འདི་ ཅིའི་དོན་དུ་བརྩམས་འདི་བྱས་པ་ལ་དགོས་པ་མེད་དམ་ཞེ་ན། དགོས་པ་ཡོད་པར་སྟོན་ཏེ། དེ་ལྟ་ནའང་རང་གི་ཡིད་ལ་བསམ་པ་བྱང་ཆུབ་ཀྱི་སེམས་གཙོ་བོར་གྱུར་པའི་ཐེག་པ་ཆེན་པོའི་ལམ་གྱི་༌ཉམས་ལེན་སྔར་ནས་ཅི་རིགས་ཡོད་པ་རྣམས་མི་ཉམས་ཤིང་འཕེལ་བ་དང་སྔར་ མེད་རྣམས་ཀྱང་བསྒོམ་སྟེ་རྒྱུད་ལ་བསྐྱེད་པའི་ཕྱིར་ངས་བསྟན་བཅོས་འདི་བརྩམས་པའམ་བྱས་པ་ཡིན་ཏེ་གོམས་པ་མཐར་ཕྱིན་པར་བྱས་ན་དོན་གསལ་བར་མངོན་སུམ་དུ་རྟོགས་པར་འགྱུར་བའི་ཕྱིར་རོ། །བརྩམས་ཞེས་འདས་པའི་ཚིག་གིས་བསྟན་པ་ནི་ཐུགས་ཡུལ་ དུ་རྫོགས་པར་བརྩམས་ཟིན་པའི་དོན་ཡིན་པར་འགྲེལ་ཆེན་སོགས་སུ་གསུངས་སོ། །
བཞི་པ་སྤྲོ་བ་བསྐྱེད་པ་ནི། དགེ་བ་བསྒོམ་ཕྱིར་སོགས་ཏེ། འོ་ན་རང་གིས་ཁོང་དུ་མ་ཆུད་ན་གཞུང་རྩོམ་ཕར་མི་རིགས་ལ་ཁོང་དུ་ཆུད་ན་དེ་ཉིད་ལ་གོམས་ཤིང་འདྲིས་པར་བྱས་པས་ཆོག་མོད། རང་དོན་དུའང་འདི་རྩོམ་ཅི་དགོས་ཏེ་རྩོམ་པ་ནི་གཡེང་བ་སྐྱེད་པའི་རྒྱུ་ཡིན་པས་སོ་ཞེ་ན། བྱང་ཆུབ་ཀྱི་སེམས་སོགས་ཐེག་ཆེན་ལམ་གྱི་ཉམས་ལེན་ཐབས་ཤེས་ཟུང་འཇུག་གི་དགེ་བ་རྒྱ་ཆེན་པོ་ལ་སྔར་ནས་ཞུགས་པ་རྣམས་ཀྱི་རྒྱུན་མི་ཉམས་ཤིང་གོང་འཕེལ་གྱི་ཚུལ་དུ་རང་ རྒྱུད་ལ་བསྐྲུན་པར་བྱ་བའམ་བསྒོམ་ཞིང་འདྲིས་པར་བྱ་བའི་ཕྱིར་བསྟན་བཅོས་འདི་ཉིད་རྩོམ་པ་ལ་ཞུགས་པ་ཡིན་ལ། དེའང་གཞུང་རྩོམ་པའི་སྐབས་སུ་མ་བརྟགས་མ་དཔྱད་པར་རང་དགར་འཇུག་པ་མིན་གྱི་ཐེག་པ་ཆེན་པོའི་གསུང་རབ་ཀྱི་གནད་དོན་ཟབ་ཅིང་རྒྱ་ཆེ་བ་རྣམས་
