༄༅། །དུལ་བའི་ཚུལ་གྱིས་བརྩམས་པ་ཡིན་གྱི་ངེད་ཀྱིས་བྱས་པ་འདི་ལས་ལྷག་པ་སུ་ལའང་མེད་ཅེས་པའི་ཁེངས་སེམས་ཀྱིས་བརྩམས་པ་མིན་ཞེས་པའི་དོན་ནོ། །དཔེ་ཁ་ཅིག་ཏུ། དེ་ཕྱིར་གཞན་གྱི་དོན་དུ་འདི་མ་བྱས། ཞེས་ཡོད་པར་མངོན་ལ། དེའི་དོན་ནི་སྔ་མ་ལྟར་བཤད་ཀྱང་ཆོག་ལ། འགའ་ཞིག་ཏུ་རང་སྟོབས་ཀྱིས་ལུང་དོན་རྟོགས་ནུས་པའི་གངས་ཟག་གཞན་གྱི་དོན་དུ་འདི་མ་བྱས་ཞེས་འཆད་པ་ལྟར་བྱས་ཀྱང་འདྲའོ། །གང་ལྟར་ཡང་དེ་ལྟ་བུ་དག་གི་དོན་དུ་བསྟན་བཅོས་འདི་བྱས་པ་མིན་པར་གཞུང་འདིས་བསྟན་ ལ། དེར་མ་ཟད། ལུང་ལས་མ་བྱུང་བ་བརྗོད་ན་ལམ་གོལ་བར་འགྱུར་བ་དང་སྙན་དངགས་དང་སྡེབ་སྦྱོར་ཙམ་གྱིས་འཇིག་རྟེན་ལས་འདས་པའི་དོན་ཟབ་མོ་སྟོན་པ་དང་རྟོགས་པར་མི་ནུས་པའང་འདིས་བསྟན་པ་ཡིན་པར་འགྲེལ་པར་གསུངས་སོ། །དཀའ་འགྲེལ་དུའང༌། བསྟན་བཅོས་རྩོམ་པ་ལ་སྡེབ་སྦྱོར་ལྷུར་ལེན་པས་གཞུང་མཛེས་པ་གཙོ་བོར་བྱེད་པ་དང་ཕན་འདོགས་པ་ལྷུར་ལེན་པས་སེམས་འདུལ་བ་གཙོ་བོར་བྱེད་པ་སྟེ་ཚུལ་གཉིས་ཡོད་པ་ལས། སློབ་དཔོན་ཞི་བའི་ལྷ་འདི་ནི་ཕན་འདོགས་པ་ལྷུར་ལེན་པ་ཡིན་གྱི་སྡེབ་སྦྱོར་ད་སྙན་ངག་ལ་ སོགས་པ་གཙོ་བོར་བྱེད་པ་མ་ཡིན་ཏེ་ཞེས་སོགས་དང༌། དེ་ལྟ་ཡིན་དུ་ཟིན་ཀྱང་འདི་ལ་དགོས་སོགས་མེད་དོ་ཞེས་བསམ་པར་མི་བྱ་སྟེ་བརྗོད་བྱ་སོགས་ཕུན་སུམ་ཚོགས་པ་དང་ལྡན་ཞིང་ཁྱད་པར་དགོས་པའི་དགོས་པ་གཞན་དོན་ཕུན་སུམ་ཚོགས་པ་འབྱུང་བ་ཡིན་ཞེས་དང༌། ཡང་ན་སློབ་དཔོན་དངོས་གྲུབ་ཐོབ་པ་དང་བདེན་པར་གཟིགས་པའི་ཚིག་ལ་ནི་དགོས་པ་ལ་སོགས་པ་མེད་པར་དོགས་པ་མི་རིགས་པས་ཞེས་སོགས་དང༌། རང་གི་དོན་དུ་བརྩམས་པར་བསྙད་པས་ནི་མཁས་པ་མངོན་པའི་ང་རྒྱལ་ཅན་འགའ་ཞིག་ཁྱོད་ཀྱིས་བདག་ཅག་རྗེས་
