༄༅། །མ་ཐག་ཡན་ཆད་དུ་མེད་པ་དེ་གཉིས་རྒྱུན་ཆགས་པ་དགོས་ཀྱི་བར་དེ་དག་ཏུ་ངོ་ཚ་ཁྲེལ་ཡོད་དང་ཉེས་དམིགས་སུ་ལྟ་བ་གང་རུང་ཞིག་སྐྱེས་ན་ཀུན་དཀྲིས་ཆེན་པོའི་ཡན་ལག་མི་ཚང་ངོ༌། །ཕྱི་མ་ཡོད་པ་གཉིས་ཀྱང་དུས་དེ་དག་གང་ རུང་དུ་བྱུང་ནས་དངོས་གཞི་རྫོགས་པའི་དེ་མ་ཐག་ཡན་ཆད་དུ་ཡོད་དེ་དག་ལས་མ་ལོག་པ་དགོས་ཀྱི་རིགས་འདྲ་བར་མ་ཆད་མི་དགོས་སོ། །དེ་ལྟར་ཡན་ལག་བཞི་པོ་འདི་ཚང་བ་ནི་ཀུན་དཀྲིས་ཆེན་པོར་རིག་པར་བྱའོ། །ཀུན་དཀྲིས་ཆུང་འབྲིང་གི་ཁྱད་པར་ནི། ཡན་ལག་དང་པོ་གསུམ་ཚང་ཡང་ཉེས་དམིགས་སུ་ལྟ་བ་ཡོད་ན་ཀུན་དཀྲིས་ཆུང་ངུ་དང༌། ཉེས་དམིགས་སུ་ལྟ་བ་མེད་ན་ཀུན་དཀྲིས་འབྲིང་དུ་ཤེས་པར་བྱའོ། །ཉེས་སྤྱོད་དེ་ལ་དགའ་བ་དང་ཕྱིས་སྤྱོད་འདོད་ཡོད་པ་ཟློས་སོ་ཞེ་ན། སྐྱོན་མེད་དེ་དགའ་བ་དང་ འདོད་པ་གཉིས་སེམས་བྱུང་སོ་སོ་བ་ཡིན་པའི་ཕྱིར་མི་ཟློས་སོ། །ཉེས་སྤྱོད་དེ་ལ་ཉེས་དམིགས་སུ་ལྟ་ན་འཛེམ་པ་དང་མི་དགའ་བ་འོང་བས་ཡན་ལག་བར་པ་གཉིས་ལས་ལོགས་སུ་ཕྱི་མ་མི་དགོས་སོ་སྙམ་ན། དེ་ནི་མ་ངེས་ཏེ་ཉེས་དམིགས་སུ་ལྟ་བ་ངོ་ཚ་ ཁྲེལ་ཡོད་ཀྱི་རྒྱུ་ཡིན་གྱི་ངོ་བོ་མ་ཡིན་པའི་ཕྱིར་དང་། ཉེས་དམིགས་སུ་མཐོང་ཡང་དགའ་བས་དེ་ལ་འཇུག་པ་ནི་ཁྲིམས་ལྡན་ལོག་གཡེམ་དུ་འཇུག་པ་ལྟ་བུ་ཡོད་པས་སོ། །དེ་ལྟ་ན་ཉེས་དམིགས་སུ་ལྟ་བ་ཡོད་ན་ངོ་ཚ་ཤེས་པ་དང་ཁྲེལ་ཡོད་པ་གཉིས་དང་ལྡན་ པས་མ་ཁྱབ་ཀྱང་། ཉེས་དམིགས་སུ་ལྟ་བ་མེད་ན་ངོ་ཚ་ཤེས་པ་དང་ཁྲེལ་ཡོད་གཉིས་མི་སྐྱེ་བས་ཁྱབ་པོ། །
བཞི་པ་སླར་གསོར་རུང་བའི་ཁྱད་པར་ནི། སོར་སྡོམ་ཕམ་པ་བྱུང་ན་བཏང་ན་སླར་གཏན་མི་སྐྱེ་བའམ་རྣམ་དག་སྐྱེ་བ་དང་འདི་མི་འདྲ་སྟེ། བྱང་སེམས་
