༄༅། །ཅེས་པ་སྟེ་གཙོ་བོར་རང་བཟོའི་ཉེས་པ་སྤོང་བ་བསྟན་ནས་ཞར་ལ་ལུང་གི་དགོངས་པ་ཐུགས་སུ་ཆུད་པའང་བསྟན་ཏེ་དེ་ནི་རང་དགར་རྩོམ་པའི་ཉེས་པ་སྤང་བའོ། །འོ་ན་ལུང་ཉིད་ཀྱིས་ཆོག་པས་འདི་བརྩམས་པས་ཅི་བྱ། དགོས་པ་མེད་ཅིང་ཟློས་པར་ ཡང་མི་འགྱུར་རམ་ཞེ་ན། གསུང་རབ་དག་ལས་གདུལ་བྱའི་བློའི་དབང་གིས་སྣ་ཚོགས་སུ་བསྟན་པ་རྣམས་བློ་དམན་ཞིང་བརྩོན་འགྲུས་ཞན་པའི་གང་ཟག་རྣམས་ཀྱིས་དེ་དག་གི་དགོངས་པ་ཇི་ལྟ་བ་བཞིན་གཟུང་བར་མི་ནུས་པས་ན་འདིར་དོན་གྱི་གནད་ཚང་ལ་མ་ནོར་ བ་ཚིག་མདོར་བསྡུས་པའི་སྒོ་ནས་ནི་འཆད་པས་ལུང་དང་ཟློས་པའི་སྐྱོན་མེད་པར་མ་ཟད་གཞུང་ཉུང་ངུས་ལུང་དོན་རྒྱ་ཆེན་པོ་བདེ་བླག་ཏུ་རྟོགས་པའི་དགོས་པ་དང་བཅས་པ་ཡིན་ནོ་ཞེས་པ་སྟེ་འདིས་ཟློས་པའི་ཉེས་པ་སྤང་བ་དང་དགོས་པ་ཡོད་པའང་བསྟན་ཏོ། །བརྗོད་ པར་བྱ་ཞེས་པ་ནི་རྩོམ་པར་དམ་བཅའ་བ་དངོས་སོ། །འགྲེལ་པ་རྣམས་སུ་ཕྱག་འཚལ་ཞེས་དྲངས་ཞེས་དང་། བརྗོད་པར་བྱ་ཞེས་བཤད་པའི་གཞིར་དྲངས་ཞེས་པ་ལྟ་བུ་བཤད་གཞི་སྔོན་དུ་ཡར་དྲངས་ནས་འཆད་པར་མཛད་ནའང་འདིར་གཞུང་ན་ཡོད་པ་ལྟར་ རིམ་པར་བཤད་དེ་འོག་མ་རྣམས་ལའང་དེ་བཞིན་ནོ། །གོང་དུ་མཆོད་བརྗོད་དང་རྩོམ་པར་དམ་བཅའི་དགོས་པ་བཤད་པའི་སྐབས་སུ་བསྟན་བཅོས་རྩོམ་པའི་བར་ཆད་ཞི་བའི་ཆེད་དང་བསྟན་བཅོས་རྩོམ་པ་ལས་མི་ལྡོག་པའི་ཆེད་ཡིན་པར་གསུངས་པའང་རྗེས་འཇུག་ ལ་སློབ་པའི་ཆེད་དུ་དེ་ལྟར་བསྟན་པ་ཡིན་གྱི་སློབ་དཔོན་མཆོག་གི་དངོས་གྲུབ་ཐོབ་པས་བར་ཆད་བྱུང་གིས་དོགས་པ་དང་དོན་ལྡན་གྱི་བྱ་བ་བརྩམས་པ་ལས་ལྡོག་པ་མི་སྲིད་དོ་ཞེས་སློབ་དཔོན་ནག་པོ་བ་གསུང་ངོ༌། །དེ་ལ། བདེ་གཤེགས་ཆོས་ཀྱི་སྐུ་མངའ་སོགས་ཀྱིས་
