༄༅། །སྒྱུར། རྒྱ་དཔེ་དང་འགྲེལ་བར། མི་གཙང་བྱུང་བསྒོས་སྨོས་ཅི་དགོས། ཞེས་གསུངས་ཏེ། བྲེད་ཅིང་ཉམ་ཐག་པས་བཤང་གཅི་ཤོར་བས་ལུས་ལ་བསྒོས་པ་ན་རྣམ་འགྱུར་གཞན་དུ་འགྱུར་བ་སྨོས་ཅི་དགོས་ཞེས་པའོ། །བཟང་སྐྱོང་གིས་ ཞུས་པར། དེ་དང་པོར་ཤི་འཕོས་ནས་དབང་མེད་པར་ཁྲིད་དེ་སྡུག་བསྔལ་ཞིང་ཡིད་མི་བདེ་བར་གྱུར་པས་མུན་པ་མུན་ནག་ཆེན་པོར་ཞུགས་ཏེ་མི་རྒོད་ཀྱིས་འཁྲིད་པ་བཞིན་དུ་འདི་སྙམ་དུ་སེམས་ཏེ། ཞེས་པ་ནས། དེ་ཡང་བདག་ཉིད་ཀྱི་མགུལ་ནས་ཞགས་པས་ བཏགས་པར་ཤེས་སོ་ཞེས་སོགས་གསུངས། དེས་ན་ད་ལྟ་ནས་སྡིག་བཤགས་དང་དགེ་སྒྲུབ་ལ་འབད་པར་རིགས་སོ། །འཇིགས་ཆེན་དངོས་སུ་བྱུང་ཚེ་སྐྱབས་བཙལ་ཡང་མི་རྙེད་པ་ནི། འཆི་བའི་དུས་ཀྱི་ཚེ་སྐྱབས་བཙལ་བས་ཆོག་མོད་སྙམ་ན། དེ་ལྟའི་འཇིགས་ སྐྲག་གི་སྣང་བ་ཆེན་པོ་མངོན་གྱུར་དུ་བྱུང་བའི་ཚེ་ཀྱི་ཧུད་ཅེས་སྨྲེ་སྔགས་དང་བཅས་ཏེ་སྐྱེས་བུ་སྙིང་རྗེ་ཅན་སུ་ཞིག་གིས་གཤིན་རྗེའི་ཕོ་ཉས་བཟུང་ཞིང་དམྱལ་བར་འགྲོ་བའི་འཇིགས་སྐྲག་ཆེན་པོ་འདི་ལས་ཕོངས་ཤིང་ཉམ་ཐག་པ་བདཀ་ལེགས་པར་ཡོངས་སུ་སྐྱོབ་ པར་བྱེད་པར་འགྱུར་ཞེས་ཤིན་ཏུ་འཇིགས་ཤིང་བྲེད་ཤ་ཐོན་པ་སྟེ་སྐྲག་པའི་ཉམས་འགྱུར་ཐོན་ཏེ་མིག་རྩ་ཞན་པས་མིག་རབ་ཏུ་བགྲད་ནས་ཕྱོགས་བཞིར་བལྟས་ནས་སྐྱབས་དག་འཚོལ་བར་བྱེད་ལ། དེ་ལྟར་ཕྱོགས་བཞིར་སྐྱབས་བཙལ་ཡང་བསོད་ནམས་མ་ བསགས་ཤིང་སྡིག་པ་མི་དགེ་བའི་ལས་ཚབས་ཆེན་བསགས་པ་དག་ཡིན་ན་དེའི་ཚེ་སྐྱབས་གནས་སུ་ཡང་མེད་པར་མཐོང་ནས་ནི་དེ་ནས་སླར་ཡང་དེ་བས་ཀྱང་རྣམ་པ་ཀུན་ཏུ་སེམས་ཞུམ་ཞིང་ཡི་མུག་པར་འགྱུར་རོ། །དེ་ལྟར་དམྱལ་བའི་གནས་འཇིགས་སུ་རུང་
