འདུན་གྱི་ཚོགས་རྣམས་ལའང་དེ་བཞིན་ཏེ་བྱང་ཆུབ་སྙིང་པོའི་བར་དུ་སྐྱབས་སུ་མཆིའོ་ཞེས་པ་ཡིན་ལ། ཚུལ་ཇི་ལྟར་སྐྱབས་སུ་འགྲོ་ན། འཇིགས་པ་དང་སྡུག་བསྔལ་ལས་སྒྲོལ་བའི་རྟེན་ཉིད་དུ་ཡིད་ཀྱིས་འཛིན་ཅིང་ངག་གིས་ཁས་ལེན་པ་སྟེ། རང་གཞན་མཐའ་དག་ སྲིད་ཞིའི་རྒུད་པས་འཇིགས་ཤིང་ཉེན་པ་ན་དེ་ལས་སྐྱོབ་པའི་ནུས་པ་སུ་ལ་ཡོད་ན་དཀོན་མཆོག་གསུམ་ལ་ཡོད་པར་ཡིད་ཆེས་པའི་དད་པའི་སྒོ་ནས་ཅི་མཛད་ཁྱེད་ཤེས་ཀྱིས་བློ་གཏོད་ཅིང་སྙིང་ནས་བསྟེན་པར་ཁས་ལེན་པའི་ཚུལ་གྱིས་སྐྱབས་སུ་མཆི་བའམ་སྐྱབས་སུ་འགྲོ་བ་ ཡིན་ལ། སོ་སོར་སྐྱབས་སུ་འགྲོ་ཚུལ་ཡང༌། སངས་རྒྱས་དཀོན་མཆོག་ནི་འཇིགས་པ་མེད་པའི་ལམ་སྟོན་པ་པོའམ་སྐྱབས་སྟོན་པ་པོ་དང༌། ཆོས་དཀོན་མཆོག་ནི་འཇིགས་པ་མེད་པའི་ལམ་དངོས་སམ་སྐྱབས་དངོས་དང༌། དགེ་འདུན་དཀོན་མཆོག་ནི་འཇིགས་པ་མེད་ པའི་ལམ་སྒྲུབ་པའི་གྲོགས་སམ་སྐྱབས་སྒྲུབ་པའི་གྲོགས་ཏེ་དེ་དང་དེ་དག་ཏུ་འཛིན་ཞིང་བསྟེན་པར་ཁས་ལེན་པ་ཡིན་ལ༑སྐྱབས་སུ་མཆི་ཞེས་པའི་ངེས་ཚིག་འཇིགས་པ་དང་སྡུག་བསྔལ་ལས་སྐྱོབ་པས་ན་སྐྱབས་དང་དེ་ལྟ་བུའི་སྐྱབས་དེ་དཔུང་གཉེན་དུ་བཟུང་ནས། གང་ཞིག་གང་ལ་སྐྱབས་སུ་འགྲོ་བ་དེ་ནི་དེའི་བཀའ་ལས་འདའ་བ་མ་ཡིན་པས་སོ་ཞེས་པ་བཞིན་དུ་དེའི་བཀའ་བཞིན་དུ་ཡོངས་སུ་བསྲུང་བ་ནི་མཆི་བའམ་འགྲོ་བའོ་ཞེས་བཤད་དོ། །དེའང་གཞན་རྒྱུད་ལ་གྲུབ་ཟིན་གྱི་ཐེག་པ་ཆེན་པོའི་མཆོག་གསུམ་ལ་འཇིགས་པ་དང་ སྡུག་བསྔལ་ལས་སྒྲོལ་བའི་རྟེན་དུ་འཛིན་རྒྱུའི་སྐྱབས་འགྲོ་དང༌། རང་རྒྱུད་ལ་འབྱུང་འགྱུར་གྱིམཆོག་གསུམ་ལ་འཇིགས་པ་དང་སྡུག་བསྔལ་ལས་སྒྲོལ་བའི་རྟེན་དུ་འཛིན་པ་འབྲས་བུའི་སྐྱབས་འགྲོ་ཡིན་པར་གསུངས་ལ། སྐབས་འདིར་ཡང་དེ་ལྟ་བུའི་གྲུབ་
