བརྗོད་པའི་སྐབས་སུ་འདི་ལྟར་བསམ་པར་བྱ་སྟེ། ཚོགས་ཞིང་རྣམས་ཀྱི་མདུན་དུ་གོང་སྨོས་ལྟར་ཀྱི་ཁྲུས་ཁང་རིན་པོ་ཆེ་སྣ་ཚོགས་ལས་གྲུབ་ཅིང་རྒྱ་ཕིབ་རིམ་པ་གསུམ་དང་ལྡན་པ། ནེའུ་གསིང་མེ་ཏོག་སྣ་ཚོགས་བཀྲ་བས་ཕྱོགས་ཐམས་ཅད་རབ་ཏུ་མཛེས་ཤིང་རིན་པོ་ཆེ་ལས་གྲུབ་ པའི་ཤིང་ལྗོན་པ་ཡིད་དུ་འོང་བ་སྣ་ཚོགས་པས་ཡོངས་སུ་བསྐོར་བ། ཁང་པའི་ཕྱོགས་བཞིར་སྒོ་རེ་རེ་དང་སྒོ་དེ་དག་སོ་སོའི་མདུན་དུ་ཁྲུས་ཀྱི་རྫིང་བུ་གྲུ་བཞི་བ་མེ་ཏོག་དབྱིབས་དང་ཁ་དོག་སྣ་ཚོགས་པས་མཛེས་པར་བརྒྱན་ཞིང་འོག་གཞིར་གསེར་གྱི་བྱེ་མ་བརྡལ་བ། ཕྱོགས་རེ་རེར་ རིན་པོ་ཆེའི་ཐེམ་སྐས་འབབ་སྟེགས་མཆོག་ཏུ་བདེ་བའི་རྣམ་པར་ཡོད་པ། ཁྲུས་རྫིང་དེ་དག་སོ་སོའི་ནང་དུ་ཤིན་ཏུ་དྲི་ཞིམ་པོའི་ངད་ལྡང་པའི་སྤོས་ཀྱི་ཆུས་ཡོངས་སུ་གང་བར་ཡོད་པ། རིན་པོ་ཆེའི་ཀ་བ་དང་མུ་ཏིག་གི་བླ་རེསོགས་ཀྱིས་བརྒྱན་པའི་ཁྱད་པར་རྣམས་གོང་དུ་སྨོས་པ་ ལྟར་གྱི་ཁང་བཟང་གི་དབུས་སུ་སེང་གེའི་ཁྲི་སོགས་སོ་སོའི་གདན་རྣམས་གསལ་གདབ། དེ་ནས་ཁྲུས་གསོལ་དངོས་ཀྱི་སྐབས་སུ་ཚོགས་ཞིང་རྣམས་སོ་སོའི་ན་བཟའ་དང་རྒྱན་ཕྲེང་སོགས་གོས་ཀྱི་གདང་ལྟ་བུར་དཔྱངས་ནས་སྐུ་གཅེར་བུར་ཁྲུས་ཁང་གི་ནང་དུ་བྱོན་ནས་གདན་རྣམས་ ལ་སོ་སོར་འཁོད་པར་བསམ། དེ་ནས་རང་ལུས་ལྷ་གྲངས་དང་མཉམ་པར་སྤྲུལ་ནས་དེ་ཐམས་ཅད་ཀྱི་ལག་ཏུ་རིན་པོ་ཆེའི་བུམ་པ་ཐོགས་ཏེ་རྫིང་བུ་རྣམས་ལས་ཆུ་བླངས་ནས་བསྟོད་བསྔགས་ཀྱི་གླུ་དབྱངས་རོལ་མོ་དང་བཅས་པས་ཁྲུས་གསོལ་བས་འགྲོ་བའི་སྣང་ངོར་དྲི་མ་ཐམས་ཅད་ དག་ཅིང་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་སྐྱེས་པར་བསམ་ནས་ཁྲུས་གསོལ་བར་བྱའོ། །ཁྲུས་གསོལ་བྱས་པའི་དགོས་པ་ནི། ད་ལྟ་རང་དང་རང་འདྲ་ཕལ་ཆེ་བ་དམ་པའི་ཆོས་ཉན་བསམ་སྒོམ་སྒྲུབ་སོགས་ལ་ཞུགས་པའི་ཚེ་བློའི་ནུས་པ་ཤིན་ཏུ་ཆུང་པས་དེ་དང་དེའི་
