ཚུལ་ལོ། །དང་པོ་ལ་གཉིས། སྒོ་གསུམ་གྱི་ཀུན་སྤྱོད་དག་པ་ལ་འབད་པ་དང༌། ཉམས་པ་བསྲུང་བའོ། །དང་པོ་ལ་གསུམ། ལུས་ངག་གི་ཀུན་སྤྱོད་ལ་བརྟག་པ་དང༌། སེམས་ཀྱི་ཀུན་སྤྱོད་ལ་བརྟག་པ་དང༌། གནང་བཀག་གི་བྱ་བའི་སྐབས་བཤད་པའོ། ། དང་པོ་ལ་བཞི། ལུས་ཀྱི་བྱ་བའི་སྔོན་དུ་ཀུན་སློང་ལ་བརྟག་པ་དང༌། ལྟ་བ་སོགས་དང་འབྲེལ་བའི་བསླབ་བྱ་དང༌། སྤྱོད་ལམ་གཞན་ལ་སྦྱར་བ་དང༌། གནས་པའི་ཀུན་སྤྱོད་ལ་བརྟག་པའོ། །དང་པོ་ནི། འགྲོ་བ་སོགས་ཀྱི་ཚེ་རེ་ཤིག་དང་པོ་ཀུན་སློང་ འདི་འདྲའི་སེམས་འདི་ནི་སྐྱོན་བཅས་དང༌། འདི་ནི་སྐྱོན་མེད་པའོ་ཞེས་ཤེས་པར་བྱས་ནས་དེའི་ཚེ་ཀུན་སློང་སྐྱོན་ཅན་བྱུང་ན་གཉེན་པོ་ཤིང་བཞིན་དུ་ཉེས་པས་མི་གཡོ་བར་གཟུངས་ཐུབ་པར་ནི་གནས་པར་བྱའོ། །གཉིས་པ་ལ་བཞི། མིག་གིས་ བལྟ་བའི་ཀུན་སྤྱོད་སྤྱིར་བསྟན་པ་དང༌། དུབ་པའི་ཚེ་ཇི་ལྟར་བྱ་བ་དང༌། གང་ཟག་གཞན་དྲུང་དུ་འོངས་པ་ལ་ཇི་ལྟར་བྱ་བ་དང༌། ངལ་བསོས་པའི་ཚེ་ཇི་ལྟར་བྱ་བའོ། །དང་པོ་ནི། དོན་མེད་པར་ཕྱོགས་སུ་གཡེང་བར་བལྟ་བ་ནི་དུས་ནམ་ཡང་བདག་གིས་ མི་བྱ་སྟེ་སེམས་ཉམས་པར་འགྱུར་བའི་ཕྱིར་རོ། །དགེ་བའི་དམིགས་པ་ལ་ངེས་པར་སེམས་པས་དུས་རྟག་ཏུ་ནི་བལྟ་བའི་ཚེ་གཉའ་ཤིང་གང་ཙམ་དུ་མིག་ནི་ཕབ་སྟེ་བལྟ་བར་བྱའོ། །གཉིས་པ་ནི། ཁམས་གསོ་བ་དང་དུབ་ན་བལྟ་བ་ངལ་བསོ་བའི་ཆེད་དུ་ནི་ རེས་འགའ་མིག་བཏེག་སྟེ་ཕྱོགས་སུ་བལྟ་བར་བྱའོ། །གསུམ་པ་ནི། དེ་ལྟར་བལྟས་པས་འགའ་ཞིག་མིག་གི་ལམ་དུ་སྣང་བར་གྱུར་ཅིང་མདུན་དུ་འོངས་ན་འཛུམ་པས་བལྟས་ནས་འོངས་པ་ལེགས་སོ་ཞེས་བརྗོད་པར་བྱའོ། །གཞན་ཡང་ལམ་དུ་ཞུགས་
