༄༅། །བསྒྲུབ་པ་དང༌། ཐེག་པ་ཆེན་པོ་ཐམས་ཅད་སྡུད་པ་དང༌། ལམ་མམ་ཐབས་ཀྱི་རྣམ་པ་ཐམས་ཅད་པའི་དབང་དུ་མཛད་པ་དང༌། བསླབ་པ་གསུམ་ལ་ལྟོས་ནས་ཕར་ཕྱིན་དྲུག་ཏུ་གྲངས་ངེས་པའོ། །དེ་ལ་ཕར་ཕྱིན་དྲུག་གི་རྒྱུ་དང༌། ངོ་བོ་དང༌། དབྱེ་བ་དང་། མིང་དོན་དང༌། འབྲས་བུའོ། །དང་པོ་ནི། ཐེག་པ་ཆེན་པོའི་རིགས་ཁྱད་པར་ཅན་དང༌། བདག་རྐྱེན་དགེ་བའི་བཤེས་གཉེན་ལ་བརྟེན་ནས་ཐེག་པ་ཆེན་པོའི་སྡེ་སྣོད་རྒྱ་ཆེན་པོ་ལ་དམིགས་ཤིང་ཤེས་རབ་དང་སྙིང་རྗེས་ཟིན་པའི་བྱང་ཆུབ་ཀྱི་ སེམས་སོ། །གཉིས་པ་ནི། སྦྱིན་པའི་ངོ་བོ་ནི་གཏོང་བའི་སེམས་པ་དགེ་བ་དང་དེས་ཀུན་ནས་བསླངས་བའི་ལུས་ངག་གི་ལས་སོ། །ཚུལ་ཁྲིམས་ནི་གཞན་གནོད་གཞི་བཅས་དང་རང་ཉིད་འབའ་ཞིག་གི་ཆེད་དུ་ཐར་པ་དོན་གཉེར་སྤོང་བའི་སེམས་པས་ བསྡུས་པའོ། །བཟོད་པ་ནི་གནོད་པ་བྱེད་པ་དང་སྡུག་བསྔལ་བྱུང་བས་མི་བརྫི་བར་སེམས་རྣལ་དུ་གནས་པ་དང༌། ཆོས་ལ་མོས་པ་ཤིན་ཏུ་གནས་པའོ། །བརྩོན་འགྲུས་ནི་དགེ་བ་བསྡུ་བ་དང་སེམས་ཅན་གྱི་དོན་བྱ་བའི་ཕྱིར་དུ་སེམས་མངོན་པར་ སྤྲོ་བ་དང་དེས་བསླངས་པའི་སྒོ་གསུམ་གྱི་ལས་གཡོ་བའོ། །བསམ་གཏན་ནི་སེམས་དགེ་བའི་དམིགས་པ་གང་རུང་གཅིག་ལ་རྩེ་གཅིག་ཏུ་གནས་པའོ། །ཤེས་རབ་ནི་དོན་དམ་པའམ་ཀུན་རྫོབ་པ་ལ་དམིགས་ཤིང་བཏགས་པའི་དངོས་པོ་ལ་ཆོས་རབ་ ཏུ་རྣམ་པར་འབྱེད་པའོ། །གསུམ་པ་ནི། སྦྱིན་པ་ལ་ཆོས་ཀྱི་སྦྱིན་པ་དང་ཟང་ཟིང་གི་སྦྱིན་པ་དང་མི་འཇིགས་པའི་སྦྱིན་པའོ། །ཚུལ་ཁྲིམས་ལ་སྡོམ་པའི་ཚུལ་ཁྲིམས་དང་དགེ་བའི་ཆོས་སྡུད་པ་དང་སེམས་ཅན་དོན་བྱེད་ཀྱི་ཚུལ་ཁྲིམས་སོ། །བཟོད་
